Ua maea se suesuega sa faia e le Komisi e Pulea tagata Faigaluega a le Malo le PSC (Public Service Commission) i tuuaiga o le aafia o se tasi o lesitala sinia o le matagaluega o Faamasinoga le susuga Tusa Latu Kioa, i le leiloloa o ni faila o mataupu tau faamasinoga, ma ua taunuu iai i se faaiuga e leai se aafiaga o le lesitala sinia ile toesea o ia faila, e pei ona mafua ai se faaiuga a le Ofisa Sili o le Matagaluega le tofa Masinalupe Tusipa Masinalupe, e faamalolo le tumau pe suspend le susuga Tusa, ae sei faia suesuega.
O le masina o Aukuso o le tausaga nei na aliae ai tuuaiga i le leiloa o le faila o ni alii se toatolu mai le nuu o Magiagi sa molia i le talepe fale ma le gaoi, peitai ua faaleaogaina le moliaga o se tasi o i latou ona o le leiloa o le faila, lea na muamua faamalolo ai se isi lesitala sinia le susuga Faatasi Puleiata ona o tuuaiga e iai lona sootaga ile mataupu ona e faapea o ia o se tasi mai le nuu lava lea o Magiagi sa nafa ma le teuina o le faila, ae na sue atu i le taimi o le a fofogaina le mataupu ua leiloa.
Na toe maua mulimuli ane le faila ma ave ai loa teu i le potu o le Ofisa Sili o le Matagaluega, i se faamatalaga a le tofa Masinalupe i se talanoaga muamua, na faia lana faaiuga lea ina nei toe leiloa foi le faila, ae o loo fia ave e fai ma molimau a le Matagaluega i le tagi a Faatasi Puleiata faasaga i le faaiuga a le PSC na faamalolo ai pe tuli ai ma lana galuega ona o le faila lava lea e tasi.
Peitai ina ua lata ina fofogaina le mataupu, ae toe sue atu le faila ua leiloa foi, ma o le mafuaaga lea na masalomia ai loa le tasi o lesitala sinia o Tusa Latu Kioa, ona o ia e vaaia mataupu uma tau faamasinoga i le faamasinoga faaitumalo le District Court. O le maea o le suesuega a le Komisi e pulea tagata faigaluega a le Malo sa feagai ma se tasi o alii ofisa sa faia le suesuega, ma taunuu ai i se faaiuga e leai se aafiaga o le susuga Tusa i le leiloa o le faila, na tuuina atu ai ma le fautuaga i le Ofisa Sili o le Matagaluega ina ia toe faafaigaluega le lesitala sinia lea ua silia i le 2 masina o faamalolo le tumau.
Fesiligia le amiotonu o le faaiuga
O le taunuuga o lea suesuega ua fesiligia ai le tulaga amiotonu na faia ai le faaiuga a le Matagaluega e faamalolo le susuga Tusa ae faia suesuega i lona aafia i le toesea o le faila. O le mafuaaga lea o le tuuina atu e le lesitala sinia o le mataupu i sana loia na te tapenaina se tagi poo se su, faasaga i le Matagaluega ona ua faaleagaina le tulaga tau lelei o lona tagata ma lana tautua, ona o le sese o tuuaiga. Ua tuuina atu foi se kopi o le lipoti o le suesuega a le PSC faatasi ai ma le fautuaga ua faia, i le loia a le lesitala sinia i le fuafuaga e tuuina atu i le faamasinoga e avea o se molimau e lagolago ai le tagi a Tusa faasaga i le faaiuga a le Matagaluega faasaga ia te ia.
Sa maua se feiloaiga ma le lesitala sinia peitai sa le mafai ona aumai sona finagalo i le tulaga ua taunuu i ai le suesuega, ona o loo tapena mo le faamasinoga, peitai o se feiloaiga ma lona faletua na iloa ai le faafiafiaina o le tina ona o le faamamaina o le igoa o lona toalua mai tuuaiga. E le o iloa poo afea o le a tuuina atu ai le tagi a Tusa ma lana loia i le faamasinoga, aua le faamoemoe e valaauina mo taualumaga masani o mataupu e oo i le faamasinoga e suesueina ai le amiotonu o ni tuuaiga ma ni faaletonu.
