Ua maea le vaega muamua o le tagi a le afioaga o Satapuala o loo avea ai nisi o Alii ma Faipule ma sui o le nuu i le finauina o eleele e silia i le 6 afe eka o loo umia nei i lalo o le faalapotopotoga o le Esetete Tausi a Samoa le Samoa Trust Estates Corporation. O le faaiuga a le faamasinoga maualuga ua talia ai le talosaga a le Loia Sili a le Malo, e soloia ma faaleaoga le faasaga o le tagi a le afioaga i le Malo (Government of Samoa) ae talia le talosaga a le nuu e ala i le latou loia, ina ia toe teuteu le latou tagi faasaga i le Faalapotopotoga o le Esetete Tausi a Samoa, lea ua iai ma se vaega o le faaiuga e faapea, e avanoa ai foi le Loia Sili e faaulu se talosaga e soloia ai poo le strike out motion.
O le talosaga a le Loia Sili e soloia le faasaga o le tagi i le Malo o Samoa, sa faavae i le finauina e Alii ma Faipule o Satapuala e faapea o se vaega o eleele o le nuu e silia i le onoafe, sa aveesea i ni faiga solitulafono e afua mai i le tausaga e 1894 i le taimi o pulega a le malo Siamani, e oo mai i le tausaga e 1942 ina ua uma pulega a Siamani ae vaaia ma pulea le atunuu e le Malo o Niu Sila.
$100 miliona e totogi atu e le Malo o se taui
E tolu vaega o loo faasaga i ai le tagi a le nuu, e aofia ai faiga taufaasese (fraud), faiga le lelei ma faatamala (negligence) i le vaaiga o fanua tau Samoa, ma se taui e tusa lona tuu aofaiga ma le $100 miliona ona o tulaga na faatino ai le aveesea o eleele o le afioaga mai le taimi o pulega a Siamani e oo mai i le Malo o Niu Sila i tausaga e tele ua mavae. Sa finau le Loia Sili a le Malo e le talafeagai le tagi a Satapuala ona faasaga i le Malo o Samoa, ona e lei iai i le taimi na faia ai fesuiaiga o eleele. O lona uiga e tatau ona faasaga ia i latou na tuuina atu fanua i lea vaitau, e ui sa iai tulafono sa puipuia ai galuega ma pulega a Malo sa vaaia Samoa i lea vaitaimi.
O loo faavae le teena e le faamasinoga maualuga i se faaiuga a le Faamasino Sili afioga Patu Tiavaasu’e Falefatu Sapolu o le tagi faasaga i le Malo, ona o lana iloiloga i mau e faavae ai le talosaga mo se taui, le faatamala o le Malo, ma faiga tau faasese, e le o iai ma se mau na tuuina atu e le loia a le nuu e mafai ai ona faamalieina le faamasinoga e faapea o le Malo o Samoa sa faia ia fefaatauaiga ma fesuiaiga o fanua e pei ona mafua ai le talosaga a le Loia sili o loo avea ma sui o le Malo, ina ia soloia ma faaleaoga.
Taatia se isi tagi a Satapuala
O loo taatia nei i le faamasinoga se isi tagi a Alii ma Faipule o Satapuala faasaga i le Malo o Samoa ona o se vaega eleele o loo faaaogaina nei mo le malaevaalele i Faleolo, lea o loo iai le mau ua uma ona taui e ala i se eleele e tusa ma le 60 eka, ua maea ona tuuina atu i le nuu. O le tasi lea o finauga i le va o le nuu ma le Malo na mafua ai ona nofoia faamalosi e Satapuala se vaega o eleele o loo i lalo o le Esetete Tausi, lea o loo faafesagai tonu ma le malaevaalele.
E oo mai i le taimi nei ua toafilemu lea feteenaiga na aliali mai i le tausaga ua mavae, ma ua usitaia foi e le nuu aiaiga ma tuutuuga na faia ma le Malo. O tamalii ma failauga o loo fai ma sui o le afioaga i nei mataupu tau faamasinoga e aofia ai le afioga Toalepaialii Toesulusulu Si’ueva II, Va’ili Mimita, Folasa Faitasiga, Iliolemalae Faamau, Tauvalaau Tinei, Toesulusulu Su’afaiga Cedric, Lasei Sione, ma Maomalie Aiomanu. E fitu aso ua tuuina atu ile tamaitai loia le afioga Maiava Visekota Peteru, o loo tauaveina le itu a le nuu i lenei finauga e tuuina atu ai teuteuga o loo manaomia i le vaega o le tagi o loo faasaga i le Faalapotopotoga o le Esetete Tausi a Samoa, ona faatoa iloa ai lea o se aso e toe faatulaga e le faamasinoga e toe fofoga ai le mataupu.
