Ua tele tausaga ou te lē o toe tu i luma o ni faamasinoga i mea tau Family Law, poo tulafono e puipui ai aiga. Na ou musu i le vaega lea o le tulafono ona o a‘u ou te fiafia tele i tamaiti laiti. Sa ou lē fia vaai i mātua ae faaaogā tamaiti e fai ma aupega pe a femisaa‘i mātua ma tetea.
Ae pagā lea, ona o le lē fea (unfair and unjust) tele o ni mataupu ua tulai mai i le fale faamasino e aafia ai aiā tatau a tamaiti, na tuua‘isese ai mātua ma aiga, na ou alu lava o‘u tu faalua i luma o le fale faamasino i le vaiaso nei ou te finau mo aiā tatau a tamaiti.
O le a ou talanoaina atu nei vaega na afaina ai tagata, na ala ai ona ou finau.
O Aiā Tatau a le Tamaitiiti ia Iloa ma Faaaogā Lona Heritage (Piitaga mai Ona Mātua)
O le vaiaso nei sa ou alu lava o‘u tu i luma o le faamasino ma ou finau e tuu mai so‘u avanoa ou te tautala ai ona e sese i lo‘u iloa le faaauau o se faamasinoga e se faamasino na te lē faatāuaina le piitaga Maori o se tamaititi o loo tauave ese atu ma Niu Sila e sona tamā papalagi mai Europa.
O le faamasinoga, sa tu muamua ai se loia papalagi mo le tina o le tamaititi. Vaai atu le faifeau palagi, i le lotu e lotu ai le tina, ua alofa i le fafine e pei e foliga mai e tele mea e tāua i le case, e foliga mai o loo faatamala i ai le loia.
Na fautuaina e le faifeau papalagi lea tina e sau i le matou ofisa.
O mea tāua nei e 3 sa ou mauaina i le faila e tatau ona fai vave e puipui ai aiā tatau a le tamaitiiti ma lona tina:
Sa faafesootai e lo‘u ofisa, ma fai se talosaga aloaia e tuu le igoa o le tamaitiiti i le vaaiga a Leoleo INTERPOL, ia aua ne‘i toe aveina faananā e le tamā o le tamaitiiti le tamaitiiti Europe ae lē iloa e le tina.
Sa ou apalai i le fale faamasino e tatau ona tapa ni lipoti mai i se isi e tomai i le matata e faasino i piitaga o tamaiti, ona o le tamaitiiti e 5 tauasga, e na te lē iloa le tāua o lona piitaga, gagana, aganuu a ona mātua.
Sa ou finau i la‘u apalai e tatau i le fale faamasino ona tapa nei lipoti auā o le tamaitiiti o le Niu Sila, o lona tina o le Niu Sila/Maori ae o le tamā o le Europa.
Ua ou ta‘ua nei mea e lua ona o le itu lenei:
Sa iai le faasā a le fale faamasino e sa ona ave le tamaitiiti e le tamā mai Europa i fafo atu o Niu Sila. E lei faalogo le papalagi mai Europa, na sola ma ave le tamaitiiti. Sa sulu si tina i Europa, fai le loia i Europa, na toe maua mai ai si ana tama.
Oo mai i Niu Sila le tina ma le tamaitiiti ae toe sau ma le tamā toe tagi i le fale faamasino e fia ave lona afafine i Europa la te toe foi.
E lei faia se taofiga i luga o le INTERPOL e le loia papalagi a le fafine. Ou te lē iloa pe aisea. Sa ou lē faatali ae fai le mea e tatau ona fai, i toe ave foi le tamaitiiti.
O le isi mea ou te fai atu i le faamasino e tatau ona fai se lipoti o le Maori Heritage o le tamaitiiti, ae fai mai le faamasino se‘i ona mafaufau pe tatau pe leai.
O lea ua ou apiliina i le High Court le tala a le faamasino na fai mai, ona ou te lagona le sese tele o le faaiuga. O le vaiaso a Gafua nei ou te iai i le High Court mo lea apili.
O le isi mataupu na tulai mai, o se pepe na ave i le falemai ona o le totolia o le ulu, sa pa‘ū i le moega, ae o lenei ua aveese ai e le malo le pepe mai mātua, fai mai o le “suspected child abuse”.
Ou te tago atu i le faila mai le falemai e leai ma se faamaoniga o iai e faamaonia ai sa fasi e mātua le pepe.
O loo o‘u taumafai e faasa‘o nei mea auā:
E lē tatau ona tuua‘ia fua mātua e leai se faamaoniga a le malo.
E lē tatau i lo‘u iloa ona vavae le mafutaga a mātua ma le tamaitiiti ae leai ni faamaoniga, na tupu se manu‘a o le tamaitiiti ona ua faaoolima i ai mātua.
Nofouta mo nei mea e pei ona ta‘ua i luga. E sili le puipuia i lo le togafitia.
