O le tala i le fafine na ma‘i i le 12 tausaga. O le ā le umi o le 12 tausaga? E 4,383 aso – 144 masina – 624 vaiaso – 105,192 itula.
E umi atu lona ma‘i nai lo le sueina o se faailoga i se iunivesite.
O se taimi umi, o lona tamaoaiga ua augapiu se mea o totoe. Ua afaina lona malosi faaletagata, aafia le va feagai ai ma uo aemaise aiga. O le faamoemoe foi i se togafitiga mo lona gasegase ua siliga, auā foi o lea ua 12 tausaga o tausaili se fofo, ae lē foi i se lelei.
• Aua le faatuatua i tagata
O se tamaitai sa fiafia e pei o isi teine o le aai. Ae iai le aso sa ia lagona ai se suiga i lona tino. Atonu sa manatu e lē afaina, o mea lava e masani na tutupu i tamaitai, ma e toe tea lava i se taimi.
Uma le masina muamua alu ma le masina e lua, e leai se suiga, faasolo ina tolu masina o loo tumau pea na ma‘i. Atoa le tausaga, ae ua faatetele. E lē gata ina faigata le gasegase, ae ua manatua le tulafono, o le ma‘i e leaga.
O ia e lē mamā (Levitiko 15:25-27). Faasā ona toe alu i le sunako e tapuai, faasā ona toe fealuai, ua ‘alo‘alo mamao foi isi tagata ma ia.
Fai mai sa saili solo i fomai, ae leai ma se isi e maua ai se toomaga. Ua tino vale, ua oomo ona mata ma ua afaina lona tino, ona o le tele o le palapala (tulou) ua alu.
Talofa e, ai e iai ni taimi sa manatunatu ai ‘sa sili ona aua ne‘i fanau mai,’ pe faapea foi ‘e sili pe ana oti.’ O lagona o le faanoanoa ma le mafatia e moe toe alafai ai, ae tuufesili ona aiga, ai o se mala, poo se faasalaga.
Ae iai le aso na faalogo ai o Iesu na te faamaloloina ma‘i ma faamagalo agasala a tagata. O i sa toe lagalagā ai se faatuatua laitiiti lava o loo i totonu ia te ia, ma faapea ai ‘toe pau lea o lou faamoemoe.’ Sa manatu ai, e tatau ona saili tasi lava i lea fesoasoani. Sa faatuatua i tagata, ae lei manuia ai, o lea ua liliu nei ia Iesu mo se laveai.
• Faatuatua i le Atua
Poo ā lava ni mea faigata o le olaga lenei o feagai ma tatou, ia aua lava ne‘i aveesea ai lo tatou talitonuga, e mafai e le Atua ona tali mai. Atonu e laiitiiti lava se galuega e fai, ae o loo iai i totonu se faitotoa e matala ai vavega a le Atua mo tatou.
Afai e tatau ona faamagalo i se isi tagata, o se mea lena e tatau ona fai, atonu o le amataga lea o ni vavega mo oe. O nisi o loo ita i o latou mātua, poo aiga foi, poo taofiofi lava ni mea tiga ua leva ona tatau ona lafoai. O se galuega laitiiti lena o loo faatatau i ai se manatu.
O le fafine lenei, sa maua i le mā e alu ia Iesu. Ua iloa uma o ia e tagata, e faasā foi e le tulafono ona fealua‘i.
Peitai, o lona manatu, toe pau lea o lona avanoa. Sa faaofiofi atu ma le loto maasiasi ma faapea ifo, “afai ou te pa‘i i ona ofu, ona ou malolo lea.”
Sa vaaia e lenei tamaitai le fetuleni atu o tagata ma tupu i lona manatu, na ona pa‘i lava, e aunoa ma le iloaina o ia e Iesu auā e tumu le motu o tagata.
Ae talofa, sa faateia ina ua tu faafuasei Iesu ma fesili, “Po o ai ea na pa‘i mai i o‘u ofu?” (fuaiupu 30). Sa laga le ausoo ma tali ane, i le fuaiupu e 31 – “Ua e silafia le motu o tagata, o loo fetaomi mai i latou ia te oe, a e te fetalai mai ea, Po o ai na pa‘i mai ia te a‘u?” E sa‘o le tali a le ausoo, aua o le lolofi ane o tagata sa fetautuleiai, ma e tele nisi sa pa‘i ia Iesu. Peitai, sa lagona e Iesu se pa‘i e ese mai i i pa‘i a le toatele. O le pa‘i a le tagata faatuatua.
• E lē faalumaina oe e le Atua
A o fesilasilafai Iesu, fai mai le Tusi Paia ua mata‘u ma gatete le fafine lenei, ua na iloaina o ia lea ua maua i le tulimanu. O lea o le a matilatila le faailoaina o ia, ae talofa o le fafine ua ta‘u leaga e le tulafono a Iutaia. Sa savali ane ma le maasiasi, ae ua ave uma i ai mata o tagata.
O nisi ua uu gutu i le ‘ino‘ino, o nisi ua pupula ane faasiasia, masalo o isi sa tauemu, pe faapefea ona alu ane i le solo a tagata. Sa faapa‘ū i luma o Iesu ma tautino, o ia lava lea sa pa‘i i lona ofu.
E mafai e le tina lea ona pepelo ona o le fefe, auā foi o le manatu sa i le ausoo, e leiloa poo ai. Ae faapefea na sue, auā e tele lima ia e aapa ane ia Iesu. Ae ua lagona le loto faamaualalo e le tina.
O le tasi lea o mafuaaga e taofia ai manuia mai ia tatou, ona tatou te lē tautino le faamaoni. Manatua, tatou te lē mafai ona pepeloina le Atua.
Sa tetei tagata i le isi tala a Iesu ina ua faapa‘ū le fafine, “Lo‘u afafine e, ua e ola i lou faatuatua; ina alu ia oe ma le manuia, ma ia e malolo i lou ma’i tiga.”
Samoa, e lē se faatuatua tele na mā ai o ia, na o si faatuatua itiiti lava, ae maua ai lona vavega. Aua sa faamaoni ma tautala ma le tonu. Soifua.
