Ua avea nei le susuga a Ben Te‘o ma tama muamua o le Toa Samoa ua taalo i le tauvaga o le State of Origin i le vaiaso talu ai.
O lenei alo o Samoa na muai iloga i le Ipu o le lalolagi i le 2008 lea na piki ai e le Toa Samoa i Ausetalia nei o taalo mo le West Tigers.
O le taaloga fita i le Aso Lulu ua tuanai o le sailia o le siamupini o le Origin na faato‘ā faaaogāina ai e le Maroons poo Kuiniselani le susuga ia Ben Te‘o i le ‘afa faaiu.
O le taimi lea na moomia ai e Kuiniselani se faasiliga malosi i lana puipui atu i le osofai a le Blues.
E valu ni pue tāua a Ben Te‘o i totonu o le sefulu minute, ae na telē sona sao i lana ‘au ma manumalo ai lava.
O lenei tama e malosi foi lana momo‘e e faatusalia i le alii o Sonny Bill. O loo manatua pea lana sikoa mataina mo le Toa Samoa i le Ipu o le Lalolagi i le taaloga ma Farani na faia i Penrith i le 2008.
E ui na manumalo Samoa i lea taaloga ma Farani ae peitai na manatu nisi sa tatau ona taalo Ben i le taaloga ma Aialani lea na faia‘ina ai ma lē sao atu ai i le Ipu.
Sa faapea o le alii ia Sam Kasiano o le Canterbury Bulldogs e muamua nei piki e Kuiniselani e sui tulaga ia Dave Taylor, ae peitai o lea ua sao i ai Te‘o.
O le agavaa o lenei alo o Samoa e maoae i luga o le malae se‘i oo atu lava i lana galuega.
O Ben o se alii loia talavou, ma o se tasi o tama taalo liki e feutagai lava e ia lona totogi ma ana konekarate e aunoa ma le faafaigaluegaina o se tasi i lana pulega (player agent).
O lona agavaa foi e tautala ai i luga o le Televise e faigaluega ai i le TV9 i lana polokalame o le Footy Show i taimi e avanoa ai. E le taumate o le a ofo i ai ni galuega faapenei pe a ritaea mai i le liki.
O le filifili o Ben ua mautinoa ai e le o tapu tama Toa Samoa i le filiga o ‘au a Niu Sa Uelese ma Kuiniselani vaganā ai tama Samoa ua taaalo mo Niu Sila ma le Kiwi.
O loo taalo nei Ben Te‘o mo le Broncos ma ua fai ma faataitaiga lelei mo tama Samoa uma o loo i le NRL lea e tepa taulai e fia taaalo i le State of Origin.
E talitonu foi le Polokalame o le Samoa Sportstar Show i Sini i luga o le FM89.3 i Aso Lua taitasi mai le aoauli i le itula e lua, “se‘i vaganā lava ua filifili e Ricky Stuart le faiaoga o Niu Sa Uelese ni tama Samoa e taaalo mo le Blues… o iina faato‘ā ono manumalo ai le Blues”.
