O le tatalaina lenei o le Vai O Vavega i Porirua Ueligitone. O le susuga i le faafeagaiga ia Peniamina ma le faletua ia Simotu Williams o i laua ia ua ofoina o la soifua e tautuaina le mamalu o le atunuu i le laumua e ala lea i le auaunaga a le Vai O Vavega.
Sa matuā faatumulia le mamalu o le atunuu i le taimi na fai ai le faapaiaga ma o se mea na matuā maofa ai le agaga ma le mafaufau ona o le lolofi atu o le mamalu o le atunuu i le fia maua o lenei vai.
Sa matuā molimauina e tagata uma le matautia o le alofa o le Atua, e le gata i le matagofie o sauniga ae o le fiafia o i latou na mafai ona molimauina le tatalaga o le vai ma faapea ona maua ai lava ma a latou vai i lea lava taimi. Sa auai uma ai le pulega a le V.O.V. ma o le faletua lava ia Lemoe Futi na ia ootiina le lipine ma tatalaina ai loa le vai.
Sa matuā faafetaia e le mamalu o le atunuu le kamupani a le Futron ma le Vai O Vavega i le tofa mamao ma le manatu alofa atu mo latou i Ueligitone.
E momoli le faafetai tele i le faafeagaia ia Peniamina ma le faletua ia Simotu aemaise le paia o le ekalesia i AOG i Porirua i le matagofie ma le lava saunia i le tele o mea taumafa sa matua tofu uma ai le mamalu o le atunuu.
