I le 18 o tausaga o Fred O’Brien ae 5 tausaga o le teineititi na ia ave faamalosi ma lona faamoemoe e faia i ai ni uiga matagā, ua leai sona ‘alofaga i le silasila a le faamasinoga.
Sa ia ave faamalosi le teineitiiti e pei ona faaalia e le itu a leoleo ma le faamoemoe e faia i ai se faigaaiga.
O le tasi lea o ona moliaga, faatasi ai ma le moliaga o le faaoolima matagā i le teineitiiti.
O le faamatalaina e leoleo o lē na aafia e faapea o se teineititi e i lalo ifo o le 16 tausaga mo le tasi o moliaga, ae o se teineititi e i lalo ifo o le 12 tausaga mo le isi o moliaga o le alii o Fred.
Peitai ina ua oo atu le tina o le teineitiiti ma fai lana molimau na ia tuuina atu le pepa fanau o lē na aafia, ma iloa ai e na o le fitu ona tausaga i le taimi na tupu ai le faaletonu ia te ia.
O Faleula i le aso 3 o Setema o le tausaga e 2008 na ave faamalosi ai e lē ua molia lē na aafia.
O le aso foi lea na ta‘ua i tolaulauga a leoleo o le solitulafono, na faaoolima matagā ai lē ua molia i lē na aafia. E na o le tolu molimau a leoleo sa lagolago ai le moni o le mea na tupu auā sa tetee malosi lē ua molia.
O le molimau a le tasi o taulealea e faapea na ia molimauina gaioiga na tupu i le aso o le solitulafono na ia ta‘ua ai, sa ia vaaia lē ua molia o savavali ane ma le teineititi i se ala savali e lata ane i lo latou fale.
Na mulimuli atu ai loa e vaai poo fea e alu i ai le solo. Fai mai le molimau na vaaia o agai atu i se fale faaleiloga poo se hut e tu i le togavao.
Na ia lafi ma mata‘i gaioiga a lē ua molia. Sa ia vaaia o loo telenoa lē ua molia, a o saofai ai lē na aafia i luga o ona vae.
A o mata‘i e le molimau nei mea uma, sa lagona mai e lē ua molia le pa‘ō o se mea ma ia iloa atu ai le molimau, ma faapea ona momo‘e faavave ese ai ma ‘uu ma lona ielavalava. Sa mulimuli atu ai le molimau.
Sa molimau le leoleo satini na faia le suesuega ma ia faailoa ai i le faamasinoga, le ta‘ua e lē ua molia i lana faamatalaga tusitusia e faapea e sa‘o sa ia ave faamalosi le teineititi ma lona faamoemoe e faia i ai se faigaaiga.
Peitai na matuā tetee lava lē ua molia e i ai sana faamatalaga faapea na faia i le leoleo.
Sa valaauina molimau mo le sailia o le amiotonu o lea vaega o le faamasinoga ma faamaonia ai e moni faamatalaga a le leoleo, ona e lagolagoina foi i le molimau a le taulealea na ia mata‘ia gaioiga uma a lē ua molia.
E lei valaauina le teineiititi e fai sana molimau seia vaganā lē na molia. Ua aumai le faaiuga a le Faamasino Sili ua faamaonia uma ai moliaga o Fred O’Brien ma ua faatali nei se lipoti mai le Ofisa Faanofo Vaavaaia ona iloa ai lea o se aso e lauina ai sona faasalaga.
