Avanoa pea maketi a Niu Sila mo fua faatoaga Samoa

O le vaiaso na tea nei sa taunuu mai ai i Niu Sila nei se au malaga sa taitai mai ele alii palemia o le malo o Samoa, Tuilaepa Aiona Lupesoliai Sailele Malielegaoi.
E toaiva le aumalaga na omai, e aofia ai ni minisita se toalua o le kapeneta, Hon Fiame Naomi Mataafa, ma Tuisugaletaua Sofara Aveau.
O le asiasi mai o lea malaga sa asia ai se tasi o nofoaga o Huckleberry Farms Wholefoods Supermarket i Aukilani, ina ia faamautinoa ai le fa‘i misiluki a le atunuu o loo fia auina mai e faatau i Niu Sila nei.
O Samoa o se tasi o atunuu sa matua faamanuiaina le tulaga o le auina mai i fafo o ana oloa, ma fua o faatoaga, e ala i le faaaogaina o le ea i femalagaina a vaalele, aemaise ai vaa o le sami i vaiaso taitasi.
O le vaitaimi o le 1990 faasolo mai ai, ma o se avanoa sa mauaina e le alii Niu Sila, sa galue i le itu tau faatoaga i Samoa, le alii palagi o Richard Cook, a o lei maua i gasegase o le tino.
Peitai sa manatu ua motusia lea faiga manaia, ina ua mai le alii palagi sa galue malosi mo lea faamoemoe, sa fesoasoani tele mo le au faifaatoaga a le atunuu, aemaise le malo. Mulimuli ane, sa mafai e se tasi o tina faipisinisi iloga a le atunuu, o ia foi o se sui o faalapotopotoga tumaoti poo matagaluega e le i lalo o le malo (NGO), ona toe tatala lea avanoa, ma ua mautinoa ai e lei leiloa lea fuafuaga sa iai.
O se faaaliga a Adi Tafunai, o le sui sinia, o le faatonu aoao foi lea o le faalapotopotoga ua faaigoaina o le Woman In Business Development, sa ia taua ai ua leva tele o taumafai ina ia auina mai pea le fa‘i a le atunuu, ma ia faaauau pea aua nei motusia.
O le faaaliga a Adi, o le faafitauli o loo feagai nei ma i latou, o le le lava o le fa‘i o loo aumai, ina ia faafeiloaia le manaoga o le latou faiga paaga ma le kamupani i Niu Sila nei, ina ia mautinoa ai ma faamautu taimi uma e faaulufale mai ai.
O le iai o le Palemia o le malo ma lana aumalaga, ua feiloai ai foi ma le vaega o loo fai feagaiga mo ia oloa a le atunuu i Aukilani, ua faaalia ai le fiafia tele e silasila ma molimauina le faagasologa o fuafuaga e pei ona galulue malosi ai, e faamautinoa ai le auina mai pea e le toe motusia o ia foi faamanuiaga.
O se tulaga manaia tele lea aua o Tuilaepa o loo avea nei ma taitaifono o le Samoa Steering Committee, poo le komiti latou te faagaioia ma tilivaina soo se manaoga e uiga i oloa a le atunuu, ae le gata i lea o ia foi o le taitaifono i le vaega lava lea a le Pasefika, le Pasefic High Level Organic Steering Group, e iai Tonga, le Atu Kuki, Vanuatu, Kilipati ma Niue.
O le faalapotopotga a le WIBDI, ua faamaonia ane foi, o le a feosasoani tele mo tagata sa aafia i le galulolo i le atunuu, i ni auala e faamalosi ai e toaaga e galulue i le totoina o le misiluki, ina le gata mo taumafa, ae faapea foi ona auina mai i fafo mo le faatuina ai e maua atu ai seleni mo le tau atinaeina ma le toe faaleleia o aiga ma nuu.
O le totoina o le fa‘i misiluki e leai sona faigata tele, ma vave tele foi ona faaaogaina mo taumafa.
O le isi avanoa ua amata nei ona talanoaina mo le faaulufaleina mai i fafo e le vaega lava lenei, o le tulaga i le suauu popo. Ua faamaonia ane foi ua iai nei se maketi mo lea foi oloa a le atunuu mo atunuu i fafo. E le gata i le misiluki, suauu popo, a o le kofe ma le koko.
O nisi ia o taumafaiga malosi o loo galulue ai nei le komiti e pei ona taitaifono ai le Palemia, ma lana aumalaga sa malaga mai, ae faapea foi le vaega lenei a le Woman In Business Development Inc.