O le Aso Toonai na aofaga potopoto ai le EFKS Rooty Hill mo la latou tausala e sailia ai se seleni mo le galuega o se Hall mo galuega fai ma faamoemoe o le autalavou ma le lotu. O loo galulue i lea mauga tapuai le susuga ia Rev Kilifi Vaifale ma le faletua ia Shelley Vaifale.
Na amatalia le aso i se sauniga puupuu ma faagasolo ai loa taualumaga masani o nei faamoemoe. Na felanulanuai togiga a le Komiti faapea le autalavou na tautuaina le mamalu o aiga, uo ma paaga na autovaa atu auā le fia fesoasoani i lea aso.
E tofu lava le foai ma le faailoaina o auala eseese na maau atu ai, o nisi foi na tauaaoina atu a latou fesoasoani ma faamau i le api o le faamoemoe ae toe tuumuli mo nisi tuatuagia. E pei ona silafia o se tasi lenei o Ekalesia ua mautu le malumalu o loo tapuaia ua loa tausaga talu ona faaulufale.
Na sosoo ai ma le maota o le galuega a o lenei ua ausia i le Aso Toonai le $92.000 e amatalia ai se galuega o le Hall.
O loo i le li‘o o le pulega Sini Sisifo le EFKS lenei a Rooty Hill ma e i le ogatotonu o le aai tele o Parramatta ma Penrith i le itu Sisifo o Sini, Ausetalia. O lenei maau ma le milomilosia o le aulotu ma o latou aiga ma paaga na faafetaia e le susuga i le Faafeagaiga i le taualuga ai o lenei aso taupoina.
