O se tasi o polokalame a le Ofisa o Aoga i le unaia pea o tamaiti Pasefika e auai i Aoga Amata, ua mafua ai polokalame ua ta‘ua o Playgroups.
O le faamoemoe o nei polokalame, ia omai tina, poo ai lava e avanoa o le aiga, faaoo mai tamaiti i le polokalame ma galulue faatasi ma tamaiti mo le 4 itula i le aso. O nei polokalame, e le totogia, ona pau le totogi o le faaavanoa lea o le 4 itula o lou taimi i aso taitasi, e te lua galulue ai ma lou alo.
O le mafuaaga foi lea o le amataina o le polokalame a le AUGA O AUTE, ona o le talitonuga, o le autu lea o le amataga o le malaga faaleaoaoga a le tamaitiiti. A lelei ona faafailele alo ma fanau i aoga amata, o le sololelei foi lea o lo latou amataga i totonu o aoga.
E ui lava e na‘o le 4 itula e faataunuu ai le polokalame, ae oloo mulimulitai polokalame a le AUGA O AUTE i le taiala o aoga amata le Te Whariki, ma fuafuaina ana polokalame e faavae i talitonuga o le taiala o le, Amanaia o le Tamaitiiti Atoa, e ala lea i le atina‘ega o lona mafaufau, tino, o le agaga ma faalogona.
Faamalosiau, Faigapaaga mafanafana ma matua ma tagata lautele, ma le Va Fealoaloai. O nei lava talitonuga poo tofa manino, ua lima taitaiina ai polokalame, sini autu, ma taiala faavae e iai le; Ola Sololelei, Ola Suesue, Ola Fesootai, Ola Faasoa, ma Faalogona o le Amanaia ma le Faatauaina.
E iai se polokalame faapitoa a le AUGA O AUTE, oloo tapena ai le oso o le tamaitiiti mo le aoga, oloo faavaeina i se suesuega sa faatinoina e le au suesue mai Ausetalia, ma oloo faaigoaina o le AUGA O AUTE, ona o le autu lea o le tomai o le tamaitiiti e malaga ma ia i le aoga, o le iai lea o sona tomai e iloa ai faitautusi ma tusitusi.
Ua faamaonia le talafeagai o lea oso ona o ni lipoti maumautu mai aoga oloo auai atu iai alo ma fanau ina ua atoa le tailima tausaga.
E fesootai lelei lenei polokalame ma Matati‘a mo tamaiti i le atunuu atoa e amata mai i le Tausaga 1, seia oo atu i le Tausaga 8.
Oloo faatinoina foi i le AUGA O AUTE le isi polokalame a le Ofisa o Aoga oloo taitaia e le faletua ia Faapaia Eteuati Faoa, o le galulue lea ma tamaiti ua taitolu ma taifa tausaga ae lei auai lava ini aoga amata, e tapena ai mo le faitau tusi ma le tusitusi, faapea ma le matematika.
O le Aso Faraile, 17 Aukuso, sa faauuina ai ni isi o tamaiti ua atoa le tailima tausaga, e iai Fuailelagi Vagavao, Selagi Vagavao, ma Isaac Elisala. E toatolu ni isi ua amata i aoga tulagalua ae sa faauu faatasi ai o; Anniville Faoa, Desna-Renee Moapati Tuimauga, ma le alii Tonga o Paea Moli. Oloo molimauina le sololelei o le taumafai o nei alo mai aoga oloo aooga ai.
Oloo taitaia le AUGA O AUTE e le afioga ia Toleafoa Solipo Matailiili Tuimauga, atoa ma le fesoasoani a matua, ia Xeena Togia, Afatia Taumaoe, Luisa Elisala Kelemete, faapea foi nai faiaoga faaolioli oloo lagolago malosi o Vaseroi Gatoloai, Pulemau Areli, Matauaina Luapene, ma Kalala Michael. O i latou uma nei ua ofoina mai o latou taimi mo le AUGA O AUTE.
Ia taui atu pea e le Atua a outou galuega lelei auā se manuia o alo ma fanau mo a taeao. Mo ni isi faamatalaga i le polokalame:
Faafesootai mai le telefoni: 256 0900, telefoni feaveai: 021027 00362 imeli: matapiner@hotmail.co.nz
