O le agiga i luga o televise ma upega tafailagi o le pagatia ai o si o tatou atunuu i le sunami i le 2009, na amata sailiili ai le tele o papalagi Ausetalia ia Samoa ma fia iloa lo tatou talaaga.
Auā o le mea moni, e anoanoai papalagi latou te lē iloa Samoa, ae na avea le sunami ma pogai autū ua iloa lautele ai nei si a tatou Samoa matalasi e papalagi Ausetalia, ua oo lava foi i Ekalesia ua amata ona faatino le alofa tulai mo Samoa.
O le faiga paaga a se tasi o Ekalesia Samoa le Truelight Christian Church ma le Ekalesia Uniting Church a Airport West i Melepone, na mafua ai ona a‘e se tofa alofa faale-Atua i lea lala o le Uniting Church, ma amata ai loa a latou sailiga seleni, ma faatau ai ato aoga faafafa faatasi ai ma le faatumuina i api, o penitala ma vase, e oo lava i solosolo ma solomata ma fasi moli, o titina ma vili peni, o peni vali ma peni maka ma tulaga uma e manaomia e tamaiti aoga, lea na ta‘ua e Barbara se tasi o tina o faauluulu i ai lenei poloketi a le Ekalesia, e silia ma le $50 tala Ausetalia le tau o le faatotogaina o le ato e tasi.
Ma e silia ma le onosefulu ato ua mae‘a saunia e fai ma o latou sao mo tamaiti Samoa, e ala i le pusa (container) a le Ekalesia aoao lea e lafoina i le isi tolu vaiaso.
O le Aso Sa aso 19 o Aokuso sa fai ai le sauniga faapitoa a le Ekalesia ma tatalo faamanuia ai mo Samoa ma ona tagatānuu, aemaise lava o ni alo ma fanau o le a faaaogāina nei fesoasoani pe a toai taunuu i laufanua o si o tatou atunuu.
Na faaalia e Barbara o se aso o le vaiaso fou o le a molimoli ai ato aoga nei i le nofoaga o iai pusa ma sauni ai loa mo Samoa.
Na lagona le agaga faagaeetia o le Ekalesia Samoa o fai paaga ma lenei Ekalesia papalagi, ona o le amanaia e nai nei Kerisiano o nai o tatou tagata.
Na faaalia e le Ekalesia i le iputi na mulimuli ane i le sauniga, e ono tausaga o faatino le fesoasoani mo se tasi atunuu, ae na avea le agai atu o le Ekalesia Samoa ma faaaogā lo latou malumalu mo sauniga, na amata ai le faigauo a Ekalesia e lua, faatasi ai ma ripoti e uiga i le sunami i nai tausaga ua mavae atu, na fai ma pogai o le autasi o finagalo o le Ekalesia e faaloaloa o latou aao fesoasoani e lē gata i la latou paaga i Melepone, ae o le mamalu foi o i Samoa, pe itiiti lava, ae tutumu lava nai container pe a tuufaatasi ma isi lala o le Ekalesia aoao i Melepone atoa.
