Talofa ua tagi auē Rasela, ma ua nuti foi le kate tautele ona ua tuua le malo e le afioga ia Fuatino Meaatoa Laulu Lualua Fui i le Aso Lulu, 5 o Iuni.
O le po o le Aso Lua, 11 o Iuni na faia ai le sauniga faaleaiga i le malumalu o le Ekalesia Aso Fitu i Ranui Porirua. Na taitaia le sauniga faaleaiga e le Susuga i le Faifeau o Oteta Tauilealo, ae sa faaopoopo foi le Susuga i le Toeaina ia Popo Su‘a. O le susuga i le faifeau ia Tilo Lualua, o se tasi lava o faifeau o le aiga sa laugaina le upu faamafanafana.
E uigaese foi le matagofie o molimau o le soifua tauivi o lenei tina, ma e leai se molimau e lei ta‘ua le agaalofa, osi aiga ma le loto toa o lenei tina i le tautuaina o le aiga, le nuu ma le nuu o tamaitai (Aualuma) sa taulamua ai i lona faamaopoopoga.
Na soifua mai Meaatoa i Savaia Lefaga i le aso 9 o Me 1936, ma o ona mātua o Asiata Tolua Lualua (Satupaitea) ma Avea‘i Fui-Lualua (Savaia Lefaga). O lona lua lea o le fanau e to‘a sefulutolu, ma ua 77 nei ona tausaga, lea ua valaauina ai e lona Matai.
I le taeao o le Aso Lulu 12 o Iuni na faia ai lona toe sauniga o le falelauasiga i le malumalu lava o le Ekalesia Aso Fitu, ma sa taitaia e lana Faifeau le Susuga ia Pastor Iosefa Tesese ma ia laugaina le upu folafola i faamafanafanaga saunia lelei mo le aiga faanoanoa faapea le aofia. Ina ua mae‘a le sauniga ona tuumuli atu lea le Aufaigaluega Paia, aiga, uo ma ē masani i le fanuatanu i Whenua Tapu mo lona oliolisaga tumau.
O le fetalaiga ia Falemua Tolua Lualua na vagana e valaau faaaloalo le Aufaigaluega ma le aofia i le Maota o le Ekalesia EFKS o Cannons Creek mo le faamae‘aina o le polokalame ma le taliga o le sua.
Na mae‘a le taumafataga ona faasolo loa lea o le polokalame i tulaga o faaaloaloga i le Aufaigaluega Paia a le Atua ma le Ekalesia Aso Fitu faapea le usoga e pei lava ona masani ai aganuu o faalavelave faapenei. O le fetalaiga ia Mua‘au Lemalu Vesi Tusani sa fai ma Fofoga o aiga na lua o le aso.
O se tulaga ese foi le ma‘au ma le tamaoaiga o aiga na lua na sasaa mai ma ua faatofusia uma ai le paia o le Aiga Sa Levi, le Ekalesia ma le usoga ia Tumua ma Pule. O le fetalaiga ia Faasootauloa na vagana fetalai e fai mai sui o Faafeagaiga, le ekalesia Aso Fitu ma le aofia e faafetaia le paia o aiga na lua e tusa o le maualuga o faaaloaloga aemaise le felanulanua’i o le taumafataga na tauaao i ai.
E avea foi lenei avanoa e faamaise atu ai la tatou nusipepa i le nofoaalo ma le paia o aiga faanoanoa i le toesea o le tina pele mai le mafutaga. Tatou loto tetele pea auā fai mai mau a le Tusi Sa: “Amuia e ua oti, o e ua oti o i le Alii”.
