Botha KO i le taamilosaga lona lua, ia Joseph Parker

E lē o toe iai se masalosaloga i le taleni fusu ma le a‘ea‘e mai i luga o le alo o le atunuu Joseph Parker, ina ua ia faatoilalo le malosi o Botha le Buffalo Pa‘epa‘e i le taamilosaga lua o le la fusuaga i le Aso Faraile i le faaiuga o le vaiaso.
O se taaloga mataina ma sa tulimatai uma e le atunuu pe tua i ni ā, pe a faatusa atu le talaaga o Francois Botha, ua 23 tausaga o taalo faapolofesa ma o lana taaloga lea ua faasefulu ai ona faia‘ina ma e telē le eseesega o tausaga o Botha 44 tausaga ma Parker na o le 21 tausaga le matua.
E tele tagata fusu iloga i le lalolagi, na mafai ona maua ai le avanoa o Botha e taalo ai, e iai Mike Tyson, Lennox Lewis, Evander Holyfield ma Wladimir Klitschko, o lona uiga e lē o se tamai tagata lea o le a sauni e faafetauia Joseph Parker. O le popolega lea sa tele foi ina iai fefaasoaaiga a le atunuu i le maitau atu, ma fesiligia pe mafai ona malo Parker i lana fusuaga lea ona o lea e foufou lona taalo faapolofesa, ae atonu o le maa fili lea a Tavita na sasau ma faaumatia ai le Filisitia o Koliata.
O le Aso Faraile o le faaiuga o le vaiaso na faataunuuina ai le fusuaga lea i le va o Joseph Parker ma Francois Botha faia lea i le Arena i Aukilani. Manatua foi o le alii Aferika lava lenei na fusu foi ma Sonny Bill Williams ia Fepuali o le amataga o le tausaga ma manumalo ai foi le alo lenei o Samoa.
Peitai e ui i le faafefe tagata o ana folafolaga i le taimi o faatalanoaga ma le autusitala, ae e lei mafai e na upu ona tatali le malolosi o le auato a Parker i totonu o le maea, i le taimi o le la fusuaga.
Na mae‘a lelei le taamilosaga muamua o taufai malolosi lava le aufusu. Mae‘a le malologa, ta le logo o le taamilosaga lona lua, 38 sekone muamua talu ona amata, ae liai le taumatau o Parker, misi ma Botha, ma e pei e foliga e ataata le Buffalo pa‘epa‘e ua misi le apakaki a Parker.
Peitai na ona toe liai lava o le taumatau o le tama Samoa, lele atu ma lena lima faafeiloai ma le alafau o si tamaloa Aferika, faasaga lelei foliga o Botha i lona itu taumatau. E lei toe faatali loa Parker, lua, tolu, fā, lima, ono tu‘i sosoo ma pa‘ū ifo ai loa i lalo Botha ma taofia ai loa e le laufali le fusuaga.
E tusa o le minute atoa o taumafai e faanofo le alii fusu i le nofoa i lona tulimanu, ona ua taugā lelei le malolosi o tu‘i na lavea ai Botha. O se fusuaga mataina ma matagofie tele i lea po. O se tulaga lelei foi mo le talaaga o fusuaga o lenei alo o Samoa, e pei ona iai le tau amataina o ana fusuaga faapolofesa.
Manatu o le a aveavea‘i ai faapea le malosi o Parker auā le faaauauina o le taleni fusu a lenei alo o Samoa.