E iloa gofie i latou ona o le mitiafu mūmū o loo matamata tetele ai le Serve team poo le au tautua.
E laufofoga fiafia, e galulue faatasi toe lē faatuaoia le auaunaga ona o le agaga faakerisiano moni, e lē manaomia se taui (volunteer ). O a latou galuega poo fuafuaga faataatia, e nafa lava ma le komiti faafoe i vaega eseese ua uma ona vaevaeina.
O lenei polokalame e pei o se fatu laau, na totō i finagalo o Susuga i faafeagaiga, Pastor Vili Aufa‘i o le Grace Point Community Church Greystanes ma Pastor Opeta Tautalafua o le Faith City A.O.G Campbelltown ina ia tuufaatasia a la Ekalesia e faia ni galuega e fesoasoani atu ai i aoga, taulaga ma councils poo pulega faaitumalo auā foi se sao o le Pasefika aemaise Samoa mo le faaleleia ma le faamamāina o le siosiomaga, o le aai tele o Sydney.
Ua lauolaola le Servolution, ona e ui ina sa naumatii le eleele na tau faato‘ā, ae a faamoemoe i le Alii, e silisiili ni fualaau ma fuga lelei ni faaeleelega mo le seleselega.
E ui ina ma‘atiati le malulu o le taeao sesegi o le Aso Toonai 16 Aperila, ae e lei faafiti ai le lolofi atu o i latou ua ofoina lo latou taimi, mo le auanaga a le Servolution Team.
E oo atu i lea aso na atofaina, ua iva (9) Ekalesia ua pulupulima faatasi. Grace Point Community Church – (Pastor Vili Aufai), Faith City AOG – (Pastor Opeta Tautalafua), Whalan Community Church – (Pastor Tom Meredith), Sydney House of Praise – (Pastor Tana Paulo), Hosanna Move by Faith – (Pastor Fuimaono Aiomata), Word of Life – (Pastor Lauiala Nanai), Church of Nazarene – (Pastor Talilotu Ofo), Norwest – (Pastor Rodney Trinidad), ma le Centre of Hope.
O le komiti faafoe na nafa ma le fuafuaina, faamaopoopoina ma le faatinoina o le polokalame atoa, na taitaiina e le Susuga ia Jason Chang mai le Grace Point Community Church.
O le afioga i le Taiulu, o se alo ua sili ona agavaa ma ua lava foi le silafia poo le tomai, i matata faapenei, o ana galuega o loo faatinoina auā le tausiga o lona aiga.
O lona faletua ia Roberta Chang, na taulamua i galuega o fesootaiga ma le tuu faatasia o minute, faamaumauga ma aiaiga faaletulafono o le polokalame atoa (Administration Manager).
O lana au fesoasoani poo le au lagolago o Fou Paulo – (Sydney House of Praise), Jo Masini – (Centre of Hope), ma Natasha Aufa i – (Grace Point). O le komiti faafoe – Susuga i faafeagaiga o, Vili Aufa‘i, Opeta Tautalafua, Fuimaono Aiomata ma Lauiala Nanai‘anu Sanerivi, Ben Sega, Steve Meredith, Lio ma Fou Paulo.
E tele vaega eseese o le latou polokalame fesoasoani sa faamaopoopoina. O le Aso Toonai na mavae, na mataina ai e le sui o la tatou nusipepa, le usu po ma le sagisagi fiafia o le Grace Point Community Church mai Greystanes.
O le polokalame o le aso poo galuega na faia lea mo le Holroyd City Council, ma o le aai ua ta‘ua o Pendle Hill, na matuā iila ma mamā atoa i lea aso. E ova i le iva sefulu (90) i latou na auai.
Na auai mai sui o le pulega faaitumalo, pei o le tamaitai o Di Tulloch, ma alii o loo nafa ma le faaleleia o paka taaalo. E tolu selau (300 ) laau na totōina i totonu o le paka. I se faamatalaga mai le tamaitai o Di, ua ala ona taoto finagalo o le pulenuu ma le aufaigaluega e totōina faalatalata i le pa, ona ua tele naua tagata faaletonuga ma le amio lē taupulea e pei o se vaisū le tusitusi poo le valiina o meatotino a le council, atonu a ola mai nei laau e toluselau, ua faigata foi ona maua se avanoa o i latou e talepe ma tusitusi ai. O le isi foi galuega na matuā lelei lona faatinoina i lea aso, o le tapeina ese o vali poo tusitusiga matagā mai pa sima o le taulaga.
Na mae‘a le galuega i le tea o le sefulu tasi i le taeao, ae ua leva foi ona manogi manaia sosisi o le papakiu na saunia e Holroyd Council mo le Servolution Team.
Ona sosoo atu lea ma le feiloaiga a le Ekalesia ma le pulenuu, na afio faapitoa mai e tufaina tusipasi ona o le agaga faageetia, i le faamamāa avega o le Servolution Team mo i latou.
Na ia taua pe saunoa foi i le tele o le sao o le Ekalesia i le siosiomaga o Pendle Hill, ua i laueleelee laau totō e tolu selau ma toe matagofie ai pa simā, na matuāa le fia pupula i ai se isi ona o le lē taupulea o amioga a le tupulaga.
O le auga ma le autū o lenei polokalame, o le faia lea o so latou sao mo le siosiomaga, o le faaleleiina o a latou fesootaiga poo faiga paaga ma pulega faaitumalo (councils), o le ‘au faipisinisi, e ala atu i galuega e sili ona faigofie ma faatauvaa, ae ia faatinoina ma le fiafia faakerisiano moni.
Faafetai i a oulua Susuga i faafeagaiga, Pastor Vili Aufa’i ma Pastor Opeta Tautalafua ona o le fatu na totō i laueleele na naumati, ae ua lauolaola ona o lo oulua maeleelega. Ae faapitoa le faamalo ia Jason ma Roberta Chang ma le komiti faafoe ona o la outou tautua lea ua i ai lona taeao.
