Ua tatau ona siaki e mātua ma tagai toto‘a i le faaaogāina e le fanau ma tupulaga talavou o le gagana masoā e lē manaomia
Ua pei lava upega o fesootaiga o se lua e lafoai iai lapisi ma otaota e le toe manomia, ona talu ai ua agai ina faaogaina sese e fanau ma tupulaga talavou.
O fetusiaiga ma fetaliaiga faaalia i luga o le upega o fesootaiga, ua aliali ai le lē mafaufau ma le gagana soonafai ma felauai ai faafitauli ma mafaufauga lē manuia o nisi o talavou.
O se sailiga sa faia e le Samoa Times i luga o upega o fesootaiga, sa maua ai nisi o fetusiaiga ma fetaliaiga a talavou.
Sa taulai nisi o faamatalaga i se finauga e foliga mai e lē o matuā maua i ai se malamalama i le mataupu o loo finau ai, ona sosoo ai lea ma le amata faaaogāina o le gagana masoā.
O upu ma faamatalaga soonafai, o loo aafia ai foi ma le matafaioi a le Faifeau, faapea ai ma tagata lotu, ma le lio i tulaga tofi i totonu o le ekalesia.
O nisi o tusitusiga o loo faailoa igoa, a o nisi e lē o mafai ona faailoaina, ae masalomia foi o igoa o loo ta‘ua, e lē o ni igoa moni, ma igoa o loo faaaogāina i le taimi nei.
E maoae lava le sogasogā valea ma le faaaogā sese o le gutu ma le mafaufau na tuu i ai e le Atua, i ia foi fanau talavou. E talitonu e lē o le gagana foi lea o loo a‘oa‘o i ai e mātua, ma manaomia e mātua e tautatala ai.
Peitai o se vaega e ao ina toe silasila toto‘a i ai mātua ma toe talanoa i fanau, ma toe a‘oa‘o i ai le gagana talafeagai e tatau ona faaaogā.
E lē taulia poo totonu o le fale, poo fafo, poo nofoaga faitele foi, e ao lava ona taofiofi ma pulea lelei le gutu ma le mafaufau ao lei faia se faamatalaga.
A masani fanau i le gagana sa‘o e tautala ai i totonu o le aiga, o le a lē taumate foi le faaaogāina o le gagana talafeagai i fafo atu o le aiga.
E tusa a pe ita pe lē fiafia i se isi, e tumau pea le manatu taofiofi ma amio pulea ona o le a‘oa‘oga faakerisiano ma le a‘oa‘oga a le Alii Faaola ua totoina i le loto o le teine ma le tama Samoa, e pei ona avea ai matua ma faiaoga muamua.
O le tasi lea o vaega o le soifuaga nei, e tulaga ese ai Samoa i le lalolagi, ona o le faaaogāina o lana tu faaaloalo, ma le ava i maāua, ma le va fealoaloai aemaise le va ma tagata lautele.
E tatau foi ona maua e tupulaga talavou lea vaega o le tauleleia o Samoa, i le faaaogāina o le gagana, tu ma aganuu faaaloalo. Atonu o se faamalosi ma se faamanatu tāua lea mo i latou, ina ia saga manino iai, ma avea o se auala ma se alafua fou o le a fesoasoani tele mo latou, ma taofia ai faaosoosoga ma manumalo ai e ala i le amio pulea, ma le faaaloalo o le isi i le tasi.
Ia latou malamalama foi, i penefiti o le amio tausaafia ma le faaaloalo, o le avea o se ata matagofie mo soo se talavou i lona soifuaga atoa, seia oo lava ina matua ma avea ma tuaa sinasina i le lumanai.
E lē mafai e se isi ona aveesea lea meaalofa, ma penefiti o le a faamanuiaina ai mo le olaga atoa, ae sili ai ona fiafia ai le finagalo o le Atua.
O Isaia, o se perofeta sa filifilia e le Atua mo lona finagalo, ina ia fai ma fesoasoani mo le nuu o le Atua. Peitai sa ia leiloa o le vaega e tasi o lona soifua e lē o faamalie ai le finagalo o le Tama, o le laugutu leaga, poo le palauvale.
Ae mulimuli ane, ina ua tuu i ai e le Agelu le malalaola i lona gutu, ona faato‘ā ia iloa lea ma tautino ai, E moni o loo ia mau ma tagata laugutu leaga ma tagata agasala.
O le gagana fou ina ua aveese le laugutu leaga ma le palauvale, ona manino ai lea o lana vaai, ma faataunuu ai le finagalo o le Atua i lona soifua.
E laina tutusa lea a‘oa‘oga a le Tusi Paia, ma le a‘oa‘oga foi a mātua Samoa, sa avea ma measina ma mea faapelepele a tuaa ua saga mai ia Pouli.
Sa iloa e le tama ma le teine Samoa i vaitaimi ua alu, o le agasala le palauvale, peitai ua o se taaloga i vai, ma ua lē toe faatāuaina e tupulaga ma le talutalu fou ua iai nei.
O le gagana masoā, o se tasi o gagana sa lē mafai ona faatagaina e mātua, e tautala ai se tasi o le fanau. E lē gata i totonu o le aiga faalotoifale i le va o mātua ma fanau lava ia. Ae faapea foi ma le va i fafo ma tagata lautele
Ua o se tagi a le pumate, ma le foe faaee i le tau se manatu ina ia ao i mātua ona toe silasila toto‘a ma siaki fanau i le faaaogāina o le gagana talafeagai.
E tusa lava poo taimi o le ita ma le loto tiga, e ao lava ina lava papale, ma onosai ma tumau i le filemu mai le Alii e suia ai lagona ma manatu leaga ma le faatiapolo.
O le amio tausaafia, agamalu ma le ola fiafia i le va ma tagata lautele tusa lava pe lē masani, pe lē aiga foi, o le a lē mafai, lē mafai lava ona aveesea pe faoa e se tasi pe a ola faamasani i ai, ma faatino i aso uma lava, totonu o aiga, poo fafo foi.
