E toatolu sui mai le Iunivesite a Samoa le Papaigalagala, sa auai i le fonotaga lona 20 a le FAGASA, sa talimalo ai le lala i Aukilani mo le lua aso, o le vaiaso na tea nei.
O le afioga ia Fonoti Dr Lafitai Iupati Fuatai, faapea le afioga ia Seiuli Vaifou Aloalii Temese, ma le susuga ia Naumati Vasa.
O le auai o sui mai Samoa i le fonotaga a le FAGASA, ona o se valaaulia sa faapitoa i ai e le lala i Aukilani, mo le manaoga ina ia mautinoa o loo o faatasi auala o loo faaaogāina mo le a‘oa‘oina o le gagana Samoa mo aoga laiti, tulagalua, ma kolisi i Samoa ma Niu Sila.
O le aano foi lea ma le sini autū o le faalapotopotoga a le FAGASA, e pei ona sa faavae mai ai. Sa maitauina le tāua tele, ma le telē o le sao o le aumalaga mai Samoa, tauala ane ia latou pepa sa faamatalaina i aso e lua o le koneferenisi, e uiga i taiala o loo faaaogāina mo aoga i Samoa e a‘oa‘o ai le gagana.
O Fonoti Dr Lafitai Iupati Fuatai, o ia o le Faatonusili mo Suesuega Faa-Samoa i le nofoaga tutotonu a le Iunivesite Aoao o Samoa (Director Centre for Samoa Studies – National University of Samoa).
O le afioga ia Seuli Vaifou Aloalii Temese, o se faiaoga sinia ma o ia foi o loo faauluulu i ai le vaega o le gagana Samoa i le Iunivesite o Samoa. O Naumati Vasa o se tasi o faiaoga o le gagana Samoa ma Aganuu, o sui ia e toatolu na malaga mai i Aukilani mo le faamoemoe o le FAGASA.
Polokalame mo aso e lua o le koneferenisi
Aso Lua, aso 19 Aperila, sa tatalaina ai i se sauniga sa taitaia e le susuga i le faafeagaiga ia Rev Victor Pouesi, ona sosoo ai lea ma le ava o le feiloaiga. Na mae‘a lea ona saunoa loa lea o le afioga i le Konesula o Samoa, Afioga Faolotoi Reupena Pogi mo le tatalaina aloaia o le fonotaga.
O lea afioga i le Peresitene aoao o le FAGASA, Galumalemana A. Hunkin, sa fai ma fofoga o le aso e talifuaitau i le saunoaga a le alii konesula, ma malo faaaloalogia sa faatasi ane. O le fofoga o le aso (MC) o le tofa Tauanuu Perenise Tapu.
Sa faaaloalo le Peresitene ma le mafutaga i Niu Sila, i le malaga mai Samoa ma taimua ai so latou finagalo ma a latou tapenaga e amata mea ai saunoaga autū ma le faatautaiga o le fonotaga.
O le afioga ia Fonoti Dr Lafitai Upati Fuatai, sa saunoa i le saunoaga autū, a o Seiuli ma Vaifou ma Naumati Vasa, sa faasoa i le tulaga o metotia ma auala e faaaogāina mo le a‘oa‘oina o le gagana.
I Niu Sila, sa muai ave le faamuamua i le afioga ia Tagaloatele Prof. Peggy Fairbairn-Dunlop (Foundation Professor of Pacific studies, AUT), ona sosoo ai lea ma le tamaitai o Salainaoloa Wilson (VUW). O se tasi lea o faiaoga sa matuā viia lana pepa sa faamatalaina i lona taimi, e pei ona molimauina e le mamalu sa auai i le fonotaga.
O le tamaitai o Salainaoloa sa fanau ma soifua i Niu Sila, peitai sa maualuga se vaega o lana tautinoga e ala i le tāua tele o lana gagana Samoa, i lona soifua a‘oa‘oina. O lea faapitoa se vaega o le lomiga a le Samoa Times, e te silasila ai i le pepa atoa ma le saunoaga a Salainaoloa Wilson.
E toatele alii ma tamaitai faiaoga, aemaise ai foi tamalii ma faletua o loo umia tulaga maualuluga i totonu o le Matagaluega o aoga ma Iunivesite a Niu Sila, sa maua le avanoa e faasoa ai ma saunoa e tusa ma le tāua tele ma le faamalosia o le a‘oa‘oina o le gagana Samoa ma Aganuu i aoga i Niu Sila.
Manulauti ma le Tofamamao a le FAGASA
Ia talia ma amanaia le Gagana Samoa i totonu o aoga i Niu Sila, amata mai i Aoga Amata seia oo lava i Iunivesite.
Ia iai ma ia lava Alagaoa e faaaogāina e faiaoga, mo galuega auā le a‘oa‘oina o le Gagana Samoa.
Ia faavae ma ia iai lava ni aoga a le FAGASA, amata mai i Aoga Amata, (Pre School) Aoga Laiti (Primary School) Aoga Faaleogalua (Intermediate School) Kolisi (College) ma Iunivesite (University).
Na fesiligia le tamaitai failautusi o le FAGASA, Maina Field. Po ua faafeiloaia nisi o manaoga ma moemitiga a le faalapotopotoga. Ae o afea foi e faataunuu ai nisi o vaega o loo tulituliloa pea e lei faataunuuina.
Saunoa Maina, o lea ua mae‘a ona taunuu nisi o vaega o le miti, peitai o lea o loo finauina pea le isi laasaga ona e fai lava si faigata ma e tele foi, o le tulaga lea i le taumafai e faavae, ma faatutū ni aoga e pei ona ta‘ua i luga.
O le finagalo o le FAGASA, o le iai o aoga e patino i le faalapotoptoga, o le faafaigofie foi lea ona maua tonu le sini ma le autū o loo manaomia mo le a‘oa‘oina o le gagana Samoa ma le Aganuu.
Matatia ua ausia, ma ua faamaonia mai e le faigamalo o Niu Sila
Ua iai le vaiaso faapitoa o le gagana Samoa i totonu o polokalame a aoga ma le atunuu atoa o Niu Sila, o lea vaiaso o loo faamalosia ai soo se tagatānuu, ma soo se tamaitiiti aoga i Niu Sila e faaaogā upu ma le gagana. O se tasi o mau sa finauina e le FAGASA.
Ua faatulagaina foi tauvaga Tautalaga Faa-Samoa i totonu o aoga, faapea le taimi e faia ai ma ua amanaia foi e le Matagaluega o Aoga, ma limataitaiina ai le faagasologa o ana a‘oa‘oga. Ua a‘oa‘oina ma amanaia le gagana Samoa i totonu o le Iunivesite i Aukilani, faapea foi ma nisi o aoga maualalalo ma Matata Eseese.
O le tausaga nei 2011, ua pasia ma ua taliaina ai e le NZQA, le Gagana Samoa mo avanoa faasikolasipi. O se tasi o matatia ua toe ausia foi ona o le finau ma le sailimalo o le FAGASA.
Na ta‘ua e Maina e faapea, o se tasi lea o mataupu ua leva ona finauina ma talosagaina, peitai ua faafiafiaina ona ua maua mai le tali, ua faatulagaina i aoga a Niu Sila, sikolasipi mo le gagana Samoa.
O ai e mafai ona fai ma sui auai o le FAGASA
O le tasi lea o fesili o loo fesili ai pea nisi o le mamalu o le atunuu, e pei ona māua ma faalogo pea i ai. O ai tonu e mafai ona auai i le faalapotopotoga, ae faapefea ona auai pe afai ua manatu e fia avea ma sui o le FAGASA?
O le tali, e soo se tasi lava e fia auai, o loo telē le avanoa ma matala pea faitotoa e ulufale ai ma avea o se sui auai. Sa manatu nisi masalo ai o se faalapotopotoga na o faiaoga, peitai sa faailoa manino e Maina, e leai, e lē na o faiaoga, ae mo soo se tamalii, failauga o le atunuu e fia auai ma lagolago ma faaaogā silafia ma agavaa o iai e taumafai ai se lelei mo le lumanai o le FAGASA, o loo maua pea le avanoa.
F.A.G.A.S.A. – Faalapotopotoga mo le A‘oa‘oina o le Gagana a Samoa i Aotearoa. Samoan Teachers and Parents Association set up to help maintain and to work for the survival of the Samoan Language and Culture through effective teaching and learning strategies in Aotearoa.
Na faamaonia mai foi e le tamaitai failautusi o Maina Field, o le vaiaso faapitoa mo le gagana Samoa mo le tausaga nei o le a amataina i le Aso Sa, aso 29 o Me e oo atu i le aso 3 o Iuni, e fetaui lelei ma le aso faamanatuina o le Fua o le Saolotoga o le malo Tutoatasi o Samoa.
O le isi fonotaga e sosoo ai a le FAGASA mo le 2012 e pei ona faamaonia mai e le Failautusi, o le a faia lea i Dunedin i le motu i Saute. O Dunedin foi la lea o le a talimalo i lea fonotaga.
