Viia le sao o le tamaitai o Salainaoloa Wilson i le fonotaga FAGASA

O se tasi o saunoaga autū o le fonotaga a le FAGASA i aso e lua o le vaiaso talu ai, sa maitauina ai ma le toto‘a e le toatele o sui sa auai, le tulaga maualuga ma le lava tapena, sa faatino ai le tapenaga a se tasi o alo tamaitai o le atunuu tauala ane i sana pepa sa faaulufaleina ma faaautu i le sini ma le faamoemoe o le tāua o le gagana Samoa i totonu o aoga.
O faiaoga o le gagana, ma faiaoga foi o loo faaaogāina le gagana Samoa e tiliva ai a latou mataupu i aoga, faapea sui uma sa auai ma faafofoga i le sao o le tamaitai o Salainaoloa Wilson, sa latou taufai molimauina le matagofie ma le tāua o lana folasaga atoa, seia oo lava ina faaiu.
O Salainaoloa o se tamaitai sa fanau ma soifua i Niu Sila, i ona mātua o le Samoa lona tina a o le Sikotilani lona tamā. E ui i lea, ae sa tiliva ma faasoa lana tapenaga e faaaogāina ai le gagana faifai pea, atoa ai ma le gagana maotua a Samoa, poo le gagana faamatai.
O le isi mafuaaga tāua lea, sa viia ai ma faamalieina le aufono, i le sao o lea foi alo o le atunuu, pe a faatusatusa lea i le toatele o alo ma fanau e fananau ma soifua a‘e i Niu Sila, faapea ai ma le tamā palagi i le tina Samoa.

O itu sa tulagaese ai le taumafaiga a Salainaoloa, ona o le loloto ma le ‘anoa o lana faasoa, aemaise lava sa avea pea o ia ma faataitaiga muamua sa taulai i ai le autū o lana suesuega ma lana molimau.

O ia lava o se faamaoniga o vaega uma sa agai i ai lana tautalaga ma lana folasaga, ma o se ata vaaia lea sa faigofie tele ai ona malamalama ma faaofigofie, atoa ai ma le talia lelei i finagalo ma loto o sui o le fonotaga sona finagalo faaalia.
O le pepa atoa lenei sa tapenaina ma saunia e Salainaoloa Wilson i le koneferenisi lona 20 a le FAGASA sa talimalo ai le lala i Aukilani, i le aso 19 & 20 o Aperila 2011.