O Samoa lava ia o le tatau e mo le tama tane e lei suafa matai poo le taulealea e tautuaina le fale o matai ma le nuu. O tala tuu mumusu ma tala tuutaliga o tiute lava o le sogaimiti o le fifi o le tafolo, ofu le palusami ma faatino le suavai auā se meatausami a matai ma le nuu. O le tama tane Samoa foi e lē lavea i le saofaiga a le aumaga ma taulelea pe a leai sana tatau.
O aso nei ua toatele tamafanau a le atunuu ua soifua ma ola a‘e i i fafo ae ua latou faatāua le laei o le taulealea Samoa o le tatau. E ui lava la e faapea e leai ni fifiga tafolo e faia i Niu Sila ma isi atunuu pe fai ai foi se faataulele‘a, ae o le tāua o lenei measina a le atunuu ona ua avea nei ma faailoga e iloa ai o oe o le tama tane Samoa.
O le faamatalaga lea a le susuga Matafai Faatu Faiumu Faletua‘i Pio, o se alo e faasino i le susuga i le faafeagaiga o Faiumu Faletua‘i Pio ma le faletua o Koreti o loo galulue i se tasi o ekalesia Samoa i Melepone Ausetalia.
Na fesiligia Matafai i sona lagona i lona laeiina o le tatau, ae o lana tala o se mea sa manao lava i ai. O le faamalosi foi lea a lona tamā le susuga i le faifeau ia ta sana tatau faapei o ia (tamā).
O sona lagona faatama tane i le tatau o se faailoga tāua poo se ID e iloa ai o ia o le Samoa auā o loo alala nei i le vaega o Ausetalia e ta‘ua o Perth i le itu i Sisifo o lea atunuu.
Fai mai lana faamatalaga o se mea sa faananau lava i ai lona loto, ona e ui lava e faapea sa fanau i Niu Sila ma malaga ane ai ma ona mātua i Ausetalia, ae lē mafai ona galo i ona lagona o ia o se taulealea Samoa e iai le taimi na te laeiina ai le malofie.
Na faaalia e lona tuaa le susuga Faiumu Faletua‘i Pio, e na o le sefulu aso na ta ai lona atalii ae mae‘a. O nisi alii a oo ina ta e alu le tai fia vaiaso o feagai ma le galuega a le tufuga ta tatau, ma e tigaina foi, ae e faafetaia lava le Atua i le agalelei i le feagai o lona atalii ma le galuega ona o lea na o le 10 aso ae mae‘a.
O lana faafetai foi lea i le susuga i le tufuga le susuga Su‘a Suluape ona o le galuega mae‘a ua faaiuina. E lima afe le totogi o le taina o le tatau e ese mai i isi alatupe mo le tausiga o le tufuga ma lana au tata, aemaise foi e lē aofia ai faaaloaloga e faia i le taimi mulimuli pe a sama le pe‘a.
O le tala a Matafai ua atoatoa nei ona lagona o se tama tane Samoa auā ua laei i le tatau o se measina a le atunuu o le a ia faalauiloa i le lalolagi aemaise le vaega o Ausetalia o loo alala ai nei.
