E latalata lava le malumalu o le Kolisi faafaifeau a Malua i le nofoaga tutotonu o le Mafutaga a Tina a le Ekalesia Faapotopotoga Kerisiano Samoa i le lotoā lava o le aoga i Malua. O se nofoaga na tua i ai sui o le Kolisi iinā a o tālia le fausia o le latou malumalu tapuai.
O se galuega ua faaopoopo i le galuega tele o le toe fausia atoa o le malumalu o le Iupeli lea ua silia i le 100 tausaga ae ua tala i lalo ma o lea la ua amata ai le galuega fou. Peitai e ui i le tala i lalo o le Iupeli tuai, o le galuega fou lenei o le malumalu o le Kolisi Faafaifeau ua faaaogā uma ai le tele o mea faufale ma totoga o le malumalu tele tuai lea a Malua.
O faamalama ma laupapa ua faaaogā uma e le Kolisi auā le toe faafouga o lona malumalu lea na tatala aloaia i le faaiuga o le vaiaso.
Faaalia e le Pule Aoga o le Kolisi le susuga ia Rev. Dr Uili, o le lu‘i lea na ave i le Kolisi i ona a‘oa‘o ina ia fausia e i latou lava le malumalu tapuai a le aoga. O lea la na saili ai loa ma saosao lava a‘oa‘o ma o latou faletua ma tapa foi fesoasoani e mafai ai ona tino mai lenei galuega tele ua faapea ona tulai mai.
E sili laitiiti atu i le $170,000 tala le tau o le falesa tele lenei ma ua aofia ai saogatupe a le aoga lava ia, o se fesoasoani a “Tamā o le Ekalesia”, o se fesoasoani a faifeau o Malua ma uo ma aiga ae faapea foi le ekalesia aoao.
O se faigataulaga a le aufailotu mo Malua ma le galuega a le Atua ua unaia e ala i le aoaoina o i latou o le a faapea ona faaaupegaina i le talalelei e tala‘i atu ma tausi ai le soifua tapuai o le atunuu i lenei foi ekalesia tele.
O le lauga o le sauniga e tatala aloaia ai lenei malumalu tapuai o le galuega ua fai i lou lava taimi, ma o le susuga i le faifeau toeaina faatonu mai Ausetalia, le susuga Peleti Toailoa lea na saunoa auā le tatalaina o lea faamoemoe tele o a‘oa‘o ma faletua o le Kolisi faafaifeau.
Faaalia e le susuga i le faifeau toeaina faatonu, o le auga o le galuega ua faia mo le Atua, ina ia mafai ona galue lava le tagata i lona taimi, ia tuu ese le tau toe tepa i taimi ua mavae ma faalagolago i galuega a tuaa ae sagai ane e fai se taulaga ma se galuega i le taimi lenei.
Na ia ta‘ua le lūgā lālō o finauga i le tala i lalo o le malumalu o le Iupeli ona ua silia i le 100 tausaga o lea malumalu ma le manatu e tāua tele le tamau i galuega a tuaa ua mavae. Peitai na ta‘ua i le lauga, a taumafai la e tamau i taimi ua tea ae o le ā le galuega e fai e nei augatupulaga.
Ua talafeauga lelei lava le faatinoga o lenei galuega ma le faauuga o tausaga i‘u a Malua e pei ona iai galuea ua faaiu o lenei tausaga, ma o se faaiuga faapitoa o lea ua iai se pine faamau tāua o le aoaoga faafaifeau e pei ona iai le galuega tele lea na faatino i lenei tausaga e le kolisi i lona malumalu tapuai.
