O se manulauti tāua ma le aogā a City Council eseese le fausia o nofoaga autu (neighbourhood centre) mo le faaaogāina e tagatānuu eseese.
Ua maitauina le faatupulaia o faalapotopotoga a tagata Samoa aemaise o ekalesia o loo faaaogāina nei tautua ma avanoa. O le itu tāua i nofoaga nei poo maota e tatala i soo se atunuu ma e faaaogāina mo se tau taugofie.
Ua atoa nei le tausaga talu ona tatala le maota faapea i le tasi o vaega o le pitonuu o Broadmeadows, o le tasi lea vaega o le aai o Melepone e toatele lo tatou atunuu e alala ma papaaao ai, o le ala foi lea o le taulamua o se tasi o tina Samoa le tamaitai o Maria Tuua e faatino fuafuaga fai faa-Samoa i le aoga o loo faiaoga ai ma ua ia tuufaatasia ai se aufaafiafia a tamaiti aoga, lea e mafai ona faafiafia ma fai ma avefu‘a Samoa i fuafuaga faatino i lea pitonuu.
Talu ai ona e faasavali e Maria le aoga mo Igilisi ma komepiuta i le maota lea, na ia ofoina ai se sao o Samoa mo le faamanatuina o le tasi tausaga o le maota, e pei ona faataunuuina i le vaiaso na tuanai atu.
Na filogia le mamalu o le valaaulia i tagatānuu mai atunuu eseese, ae o le mamalu foi mai le tele o matagaluega eseese e lē gata o ē na fai ma malo faaaloalogia ae o i latou foi na fai sao mo faafiafiaga o le faamoemoe.
Sa tatalaina aloaia le faamoemoe e le ausiva mai le Meadows Primary School lea e galue ai Maria ma na saunoa Maria na uigaese le mataina o nai alo ma fanau ona o le laiti o o latou tausaga ae maeu le loto atunuu. Talosia ia aveaveai ai pea la latou taleni.
