O se finagalo lea o le alii pule o le nusipepa o le Samoa Observer i sana folasaga i le fono tele lona tolu a Ofisa Faasalalau a le Pasefika lea na talimalo ai Samoa i lenei vaiaso.
O le lauga e tatala ai lenei fonotele na saunia e le afioga i le Sui Palemia, le Afioga Fonotoe Pierre Lauofo e pei ona ia unai ai le galuega ua faatautaia e le Malo i ana fuafuaga o atinae o le atunuu e saili ma faamautu auala e mafai ai ona faaitiitia pe tafiesea foi le ola mativa i totonu o Samoa.
O le faaaliga a le afioga Savea o lea ua 21 tausaga o le taitaiga a le Vaega Faaupufai e Puipuia Aia Tatau a tagata le HRPP o Samoa, ae o lea lava foi e lei mafai lava ona aveesea le ola mativa o loo molimauina i totonu o le atunuu.
O le aveesea o le ola mativa na ia ta‘ua o le matafaioi lea a le Malo ae lē o se matafaioi a tusitala auā o le galuega a tusitala o le laga o mataupu faapea ina ia ao ai finagalo o le atunuu ma unai ai soo se Malo e vaavaai i faafitauli o loo tulai mai ma saili se fofo.
O le mau a le alii tusitala matua, ua tele le faafitauli o le lē tagolima o tagata Samoa ma o se tasi lava lea o mafuaaga – o le toeitiiti aso uma e faatino i foai faaleaganuu. Ua faatatau lana saunoaga i faalavelave ua tele ai le tupe alu a aiga.
Na laga foi e Savea le tatau i le Malo ona saili auala e fesoasoani ai i tagata lautele i afioaga o loo fia maua se fesoasoani e atia‘e ai ma o se tasi o auala na ia fautuaina e mafai ona agai mai ai le seleni a le malo o loo alu ai o tupe o loo totogi ai sui a le Malo i afioaga taitasi.
E tusa ma le 149 afioaga o Samoa, ae tofu lava ma sui o le Malo i totonu o nei afioaga ma e oo i le taiono o loo maua le ta‘i $500 tala i le masina ona o ia tofiga.
O le fautuaga a le alii faatonu e lē iloa poo le ā tonu lava le galuega o faia e le toatele o nei sui ae e silia i le $5 miliona tala o loo alu ai i le tausaga i nei tagata.
Faaalia e Savea o le umi ona iai o se malo i totonu o ni pulega o atunuu e maua ai foi ma le manatu e lē anoanoa mataupu ogaoga o atunuu ma atonu ua faatuatuanai ai i le tāua o le tafiesea o le ola mativa.
O le autū o le vaega lea o le fono a tusitala o le Pasefika o le vaavaai i galuega a ofisa faasalalau poo tusitala e mafai ai ona fesoasoani i le tuuitiitia o le ola mativa.
O le finagalo o le afioga i le Sui Palemia, e lei nofonofo le malo i le taumafaiga e saili auala eseese ina ia fesoasoani ai i le lē tagolima e pei ona ta‘ua ma e moomia le tutu faatasi o soo se faigamalo ma ofisa faasalalau faapea nusipepa ina ia mautinoa e maua le tali lea e moomnia o le atia‘e o soifua o tagata o soo se atunuu, aemaise o le aveese ai o le ola mativa.
Ma na ia faaalia o suiga ua mafai ona faatino nei e Samoa i lenei vaitaimi ua mafai ona faatino le tele o galuega lelei ua vaaia nei i Samoa.
O isi mataupu na laga i lea fono tele o le fesoasoani e tatau ona unai e ofisa faasalalau ma nusipepa i le atinae o tamaitai ma le faalauiloa ai o sauaga ua faia faasaga i fanau ma tina o le Pasefika.
O galuega ua faatino e ofisa faasalalau ina ia mautinoa ai le sao o lenei foi auaunaga i le atinae ma le faaleleia o atunuu o le itulagi.
O le aotelega o feiloaiga faaleaoaoga na faatautaia a tusitala i lenei vaiaso, ua matauina ai le manaoga mo taiala ina ia faamalosia ai le faatinoga o galuega faalauiloa ma galuega tau lagalaga a tusitala aemaise lava i totonu o Samoa.
E pei ona silafia o loo iai se fono o loo tau fausia i Samoa ina ia mafai ona faamalosia ai tulafono i le faatinoga o galuega faatusitala. O le vaega e toe fuataina le tulaga o iai tulafono na feiloai ma tusitala o Samoa auā le faatinoga o lenei faamoemoe.
