Unai e tina Metotisi le tomai o le gaosiga o le elei

Ua taatele aoaoga o le su‘isu‘i ua faatauaia mo faalapotopotoga o tamaitai i totonu o afioaga eseese o Samoa.

O se tomai ua manatu mafutaga nei aemaise o le Matagaluega o Tina ma Tamaitai, Atinae o Nuu ma Aga Fesootai, ua talafeagai le faamalosia ina ia maua ai e tina ma tamaitai o soo se nuu o le atunuu le tomai e su‘i ai laei o sui o le aiga.

E le gata ina avea ma faamāmā avega i le tupe e tau faaalu i le tau o lavalava ae o se auala foi lea mo i latou e lelei i lenei taleni e faatau ai lavalava e mafai ona tuufaatasia ma su‘i.

Ua faamautu foi le itu i le iniini poo falelalaga ua faagasolo i tausaga taitasi i afioaga ma ua faaiu i faalelegapepe e faatautaia i le motu o Upolu faapea ai le motu tele i Salafai.

O le elei lea ua amata ona toe vaaia le malosi i galuega taulima a tina o afioaga eseese ma ua toe malosi le vaaia o le faaaogā o le siapo poo ie ua elei i le tele o ta‘igasua i faalavelave.

O se tomai ua toatele ua iloa ua iai le manaoga o tina ma mafutaga a tamaitai o le Ekalesia Metotisi e aofia i totonu o a latou polokalame faaleaoaoga ua unaia i tamaitai o le ekalesia.

O le vaiaso na tea nei na maua ai loa le avanoa mo tina o le Sinoti tele a Apia lea e 25 aulotu poo matagaluega o loo aofia ai ina ia aoaoina le faatautaiga o le elei mo soo se laei. O vaiaso taitasi ia ua faatautaia ai aoaoga mo matagaluega ma sinoti eseese i totonu o le atunuu.

Na faaalia e le Peresetene o le mafutaga a tina o le Sinoti o Apia, le faletua ia Stela Simamao e leai lava se isi auala sili atu nai lo le atinae o tina ma tomai eseese e mafai ona o latou maua auā le feagai ai o tausimea a aiga aemaise o i latou foi e tele i ai le faalagolago i le galuega o le saunia o auala e faamatagofie ai malumalu.

Na faapea foi ona valaaulia e le Matagaluega tamaitai talavou i lenei aoaoga ina ia maua e tamaitai uma lea tomai. Ona pau le faigata na matauina i le faagasologa o le aoaoga, e fai foi o le fia maua o le tomai ae e pei lava o pisinisi uma, e tatau ona iai le tupe faavae e faatino ai meafaigaluega mo nei aoaoga.

O le tupe e tatau ona maua auā le faatauina o ie e faatino ai le valiina o le elei. E tatau foi ona iai vali eseese mo le mamanu ina ia eseese ma matagofie i le vaai. O le matagaluega lava ia i Matafele, le nofoaga na faatautaia ai lea aoaoga, ua mautu le latou atinae lea i lana tupulaga talavou e pei ona gaosi ai le elei ma faatau atu i faleoloa o le taulaga o Apia.

O lea la na malosi foi le lagolago a faletua ma tamaitai o le aulotu lea ia i latou o sui o isi matagaluega ina ia mafai ona saga unaia lea atinae i totonu o aulotu a le Sinoti.  E lei umi se taimi ae vaaia le toatele o tina ua mafai ona agai i le valiina o le elei aemaise o le mafaufau lava o i latou i mamanu ua faaaogā ai ata o le siosiomaga auā le valiina o ie na maua mo ia aoaoga.

Ua iai le vaavaai a le faauluuluga o le Sinoti ina ia faaauau polokalame o le elei auā fesoasoani ai i tina o a latou mafutaga aemaise foi o le faamāmā i manaoga tau elei i faatasiga a Matagaluega eseese poo le Sinoti foi.