O le vaiaso nei lea ua faamoemoe e faatau atu ai i tua le ata tifaga fou ua faaigoaina o le TUAMASINA. O lenei ata tifaga sa pueina uma lava i le motu tele i Salafai, o loo faaautu lea i le alii o Lauina Faalifu, lea sa avea muamua ma Masi i le ata tifaga o le Tagi a le Faipopo Part 1 ma le Part 2, faapea le tamaitai o Lumepa Tiperia Matafeo, poo Teuila e pei ona lausilafia ai i le ata o le Tautoga Gausia.
O le Tuamasina o loo pueina e le South Seas Pictures e faavae i se tala na tusia e Tanupo Fiu Fogalevai Lemalu Aukuso. “O le agaga fiafia ina ua maua le avanoa e galulue faatasi ai ma le Susuga ia Faalifu Lauina, faapea le tamaitai o Lumepa Matafeo, auā o nisi o alo o le atunuu ua lauiloa i le taleni o le faatinoina o ata tifaga,” o le faaliga lea mai le South Seas Pictures.
O le Susuga ia Faalifu Lauina sa muai amata mai lana taleni i le ata lauiloa o le Tagi a le Faipopo i le Vaega muamua ma le Vaega lua. Na ta‘ua e Faalifu lona agaga fiafia tele ma lona loto faafetai i le pulega a le South Seas Pictures ia ua amanaia lona tagata faatauvaa, i le ata fou lenei o le Tuamasina, ua mafai ai ona toe faaauau lana taleni ma maua ai se seleni e tausi ai si ona aiga.
Na faaalia foi e le tamaitai o Lumepa Matafeo lona agaga fiafia ina ua toe foi mai i le faatinoina o ata tifaga. Na ia ta‘ua sa leai sona manatu e auai atu i se isi kamupani pueata tifaga, e ui lava i le tele o ofa na avatu e nisi kamupani ia te ia, peitai, sa iai lava lona talitonuga e iai lava le taimi e toe faaaogāina ai o ia e le South Seas Pictures.
Na ia ta‘ua foi lona agaga faafetai i le avanoa ua mafai ai ona galulue faatasi ma Faalifu Lauina i le TUAMASINA i lalo o le taitaiga a Tanupo Fiu Fogalevai Lemalu Aukuso ma lona faletua ia Faumuina Taufau Aukuso ma le South Seas Pictures.
O le tala o loo pueina ai lenei ata, e faatatau lea i le olaga o se alii e suafa ia Tanielu o loo faatinoina e Faalifu Lauina, sa vaetama i ai le uo mamae a lona tamā e igoa ia Fiso o loo faatinoina e Faaolatane Moe Pa‘o.
E lei tausia e Fiso ia Tanielu o sona atalii, ae na tuu i le maumaga ma ola a‘e ai o se Tuamasina.
Ina ua matua Tanielu na amata ai ona tuufesili poo ai lona tupuaga? O lea fesili na tali mai i le tuugamau e lona tuafafine o Maselina ua leva ona maliu.
O le vaiaso nei o le a amata faatau atu ai i tua le Vaega 1 o le Tuamasina. Na ta‘ua e Tanupo Fiu Fogalevai Aukuso, e iai le Vaega 2 o le ata lenei, ma o se ata tifaga foi o le a faamemelo i ai le maimoa a le atunuu.
O le Tuamasina, ua sefuluono i ai ata tifaga ua pueina e le South Seas Pictures, lea na amata mai i le Tautoga Gausia, ma faasolo mai ai i le Tuiga, Faamagalo, Naomi ma le Matai, ma le tele o isi ata ua faatauina atu i tua mo le maimoaga a le atunuu.
Na ta‘ua foi o loo matala pea le avanoa mo soo se tasi e fia auai i le pueina o ata tifaga, e mafai ona fesootai mai i le 2764417, poo le 0223078324, o loo ofo atu foi se totogi lelei mo tagata uma e auai i le pueina o ata tifaga a le South Seas Pictures.
