Na matuā faatumulia le maota o le Arena i le taulaga o Porirua i le Aso Toonai 1 o Tesema ina ua gasolosolo atu aiga ma uo aemaise o le auvalaaulia a le aufaauu e molimauina le faaiuga o galuega o lenei tausaga sa a‘otau ai i le Kolisi o le Tusi Paia, “Ia Malamalama AGAPE Bible College”.
Ua toe faamanatu mai ai pea le Tusi Paia i aso faapenei: “O le tama poto e faafiafia ai le tamā a o le tama valea e faanoanoa ai le tina”. E toasefululima i latou na faauuina i lea aso. E toavalu le faailoga Associate of Arts, ae toafitu na maua faailoga B.A. O suafa nei o i latou na faauuina ma o latou alalafaga:
Associate of Arts:
Ana Taafua Toamua,
Ata Tagoai Satitioa Aleipata,
Bridget Nofoaiga Sagone ,
Kelemete Kelemete Siumu ma Asau,
Telemalanuola Fetaui Matatula Am.Samoa
Maria Aiulu Fasitoo Uta
Paepae Masau Solosolo
Uputaua Nofoaiga Sagone
Bachelor of Arts:
Afioga Toia Mulifanua
Iafeta Pepa Matautu Falealili
Merita Taulapapa Fogapoa
Paulo Seleni Vavau
Pese Peniata Lalomauga
Rev Roki Siamomua Vaovai Falealili
Taii Moresi Siufaga Falelatai
O le susuga ia Kelemete Kelemete na ia mauaina le sikolasipi e a‘oga fua ai mo le lua tausaga i le faailoga o le B.A.
O ia foi na ulu i ai le vasega lea o le Associate of Arts. E toalua ni tamaitai na mauaina faailoga tusipasi mo le tulua – Bridget Fualolo Nofoaiga a o Maria Aiulu na mauaina le tusipasi i le tutolu i le vasega faasauni lea. E momoli atu ai le faamalo i nei alo o le atunuu, i le filifiligā ma le taumafai atu mo le finagalo o le Atua. O le fua lava na outou lulu lea ua outou luluina e ala faaiuga manuia ua tou maua.
Na saunoa le susuga i le Pulea‘oga o Timoteo Williams o lē na fai ma fofoga o le aso; e 14 Aoga Tusi Paia ua faia i le gagana Samoa ma e aoaoina ai soo se tagata mai soo se ekalesia.
O nei aoga na faatuina lava e le afioga i le Peresetene o Rev Dr. Peniamina Williams i Ueligitone, Aukilani, Karaiesetete, Perisipeni ma Sini i Ausetalia, ma ua faapea foi ona faatuina ma le Apia Harvest School i Samoa.
Matagofie tele nei galuega tāua ma le aogā mo alo ma fanau a Samoa ina ia faalautele ai le silafia i le Tusi Paia ma avea ai ma auauna tala‘i o le talalelei a Keriso.
O se faauuga matagofie tele ina ua mafai ona auai le mamalu o malo faaaloalogia. Na saunoa faalaeiau ai foi le MP o Mana, Kris Faafoi faapea le Komesina Sili o Samoa, Leasi Papaalii Scanlan aemaise o le Malo na aami mai, Sam Sweg Ministries i Montana USA o le susuga ia Rev. Sam Sweg o se faifeau fai faamalologa foi.
