O si tama o Tavita ma lana tatalo o loo i le Tusi a Salamo, ma ana maata e lima lea sa faaautu i ai le saunoaga a le susuga i le faafeagaiga ia Ieremia o le Ekalesia Nasareta i Papatoetoe, sa ia taitaia le sauniga e amatalia ai le faamoemoe o lea aso ina ua uma ona fetalai le tofa ia Iumai Fale Lavea e fai ma sui o le komiti a lenei ‘au, e faafeiloai aloaia ai i latou sa auai atu i lea aso. Sa tele ina faaaogā gagana e lua o le Igilisi ma le faa-Samoa auā sa auai nai tamaiti Fiti ma o latou mātua i lea aso
O le mae‘a o le sauniga, ona amata loa lea o le latou polokalame faatulagaina. Na tuuina muamua le avanoa i le susuga i le Faiaoga o le ‘au le susuga ia John Manufelavei Ioane, ma sa ia faafetaia ai lana ‘au aemaise i o latou mātua e faapea foi i le komiti ona o la latou lagolago i aso o toleniga e faapea foi i la latou tapuaiga i aso o taaloga.
O le afioga i le taitaifono sa tuuina atu i ai le avanoa mo le tufatufaina o faailoga mo tama taaalo o le ‘au. Na tofu ipu uma tama taaalo o le ‘au, o loo lolomiina ai o latou suafa ma le tausaga 2012 e manatua ai foi lenei tausaga ma lana taamilosaga.
E fa faailoga faapitoa e pei o le Young Player of the Year, na maua lea e le alii o Simon Ioane Niko, o le tama taalo o le laina i luma na maua lea e le susuga ia Moana Salesa, o le tama taalo o le laina i tua na maua lea e le alii o John Rakibulah ae o le ipu o le tama taalo o le tausaga (Player of the Year) na maua lea e le alii o Isaia Vuki, o le alii o Isaia o lona tina e tupuga mai le motu tele i Salafai.
O le mae‘a o le tufatufaina o faailoga, ona alo loa lea i le taumafataga tele na saunia e le laulau. Na maua se avanoa na feiloai ai ma le afioga i le taitaifono o lenei ‘au le afioga ia Manufelavei Iosefo Ioane ma fesiligia ai i tulaga na iai le ‘au i lenei tausaga. Saunoa Manufelavei o le lima nei o tausaga talu ona faavae mai le aulakapi a lenei nuu.
E tolu tausaga i le Iuni lakapi a le Aukilani Samoa ae o le lua lenei o tausaga i le Samoa United ma lana ia foi taamilosaga. O le tausaga na tea nei na lei tulai mai i se tulaga lelei, peitai o lenei tausaga ua tulai mai i le tulaga lua, ina ua malolo i le ‘au malosi a le afioaga o Nofoalii mai Aana i le sailiga o le siamupini o le tamilosaga.
Ae na ta‘ua foi e le afioga ia Manufelavei le fiafia o lenei nuu, ona o se tasi o alo o lenei afioaga, o lea ua taalo i le fitu a Niu Sila le alii o Belgum Sauma Tuatagalevao. O se tasi o lē ua taalo ia Auckland Rep, o le tasi ua vaavaai mai i ai le ‘au a Northland faapea foi le ‘au a Southland. Ua māua foi e iai se isi faamoemoe tele a lenei ‘au o le a tatala aloaia i se taimi e lē o toe mamao.
O le taitaifono o le afioga ia Manufelavei Iosefo Ioane, failautusi o Niu Moa So‘olefai, teutupe o Taito Susuga Pa‘u, faiaoga o le ‘au o John Ioane Manufelavei, faiaoga lagolago o Leituala Gaoa Ueli, faufautua o le ‘au o Iumai Fale Lavea, ma le faatamā o le tofa ia Teleai Soolefai Laione.
