E tupu pea i tausaga taitasi lea aso ua atofaina faapitoa mo alo ma tamafanau uma o le Pasefika ua latou ausia ni tulaga poo faailoga maualuluga na latou taumafai i ai i totonu o le nofoaga i Epson.
O lea faamoemoe o le naunau lava ia faafiafiaina i latou ua iu ma le manuia le faatamasoaliiga sa alo i ai i le fia tausaga auā lava le naunau i le lumanai manuia o aiga ma fanau.
O le afiafi o le Aso Faraile 29 o Novema, na toe mafuta faatasi ai foi tamafanau o le Pasefika ma nisi o alo foi o le Pasefika o loo galulue i totonu o le nofoaga i Epson e faataunuu lea faamoemoe e pei ona tupu pea i tausaga taitasi.
E silia i le 20 i latou sa faauuina i le Iunivesete i Aukilani i le amataga o lenei tuasaga, lea sa tauala uma atu i le nofoaga i Epson ni a latou mataupu sa aotauina ai ma faaiuina ai ma le manuia le taumafai.
O se aso fiafia tele mo sui nei o le Pasefika auā foi o lea ua molimauina faatasi uma ai e le aiga le aso ua faapitoa mo i latou. E ese foi le suiga i le maitau i lea afiafi auā e filogia uma atunuu esese o le Pasefika sa auai, na amata lava i le faamasani o tagata uma ma inu le juice ma le keke.
Sa iai nisi o tamā ma tina matutua o le tatou atunuu sa auai, faatasi ai ma nisi o tuaa matutua mai nisi foi tatou uso tuaoi o le Pasefika.
O le team a Tonga o loo aotauina i totonu o lenei nofoaga sa tatalaina le mafutaga i le latou faafiafiaga ona sosoo lea ma le saunoaga a se tasi o alo o le atunuu o loo galue ai foi i totonu o lenei Aoga, le faletua ia Tanya Wendt-Samu, o ia o loo faauluulu i ai le vaega a le Pasefika a le Iunivesite i mataupu e aooga ai.
O i latou uma nei e eseese vaega o tulaga tau le aoaoga sa tauaveina, o nisi sa tauivi mo faiaoga Amata, o nisi o le Tulagalua a o nisi o luga i aoga maualuluga. Na taualuga polokalame o lea afiafi i saasaaga a i latou uma sa autu i ai lenei faamoemoe, ma faaiu ai loa i le lululima ma faamanuia le Kirisimasi ma le Tausaga Fou auā e leai se taimi e toe mafuta ai.
