Asiasi tamaiti aoga Okinawa i Samoa

O se vasega o tama ma teine aoga mai i le malo o Iapani ua i Samoa i le vaiaso lenei mo se asiasiga i lalo o se polokalame ua ta‘ua o Atina‘e o Tupulaga a Okinawa i fesootaiga faavaomalo.
E to‘a 13 tamaiti aoga o lenei polokalame ua i Samoa ma o le vaega tele o lenei asiasiga o le a afea ai nofoaga ua faatautaia ai galuega atia‘e a Iapani. E lē gata i lea o nuu o loo galulue ai nisi o tagatānuu o Iapani e aunoa ma se totogi.
O le faamatalaga a le Ofisa o Iapani i Samoa, o le polokalame lenei e unai ai e lenei vaega o Iapani, le motu o Okinawa le malaga i fafo o ona tupulaga ma ia malamalama ai i galuega ua faatino e lea Malo i soo se itu o le lalolagi. O le vaiaso lenei o le a iai feiloaiga a ia tama ma teine aoga ma le latou ofisa o Iapani i Samoa nei. E lē gata i lea o le Matagaluega o Fefaatauaiga i Samoa.
O le a o latou asiasia nisi o atinae a le Pulega o le Suavai, o le Faatanoa tele i Alaoa o loo togafitia ai le suavai taumafa i le tele o le atunuu. E lē gata i lea o feiloaiga ma le matagaluega o Punaoa Faalenatura ma le Siosiomaga.
O nofoaga faasao i Savaii e pei o le Pupu Pu‘e se nofoaga faasao o le Malo i Togitogiga ma o le a fai ai se totogalaau ma le aoga a Palalaua i Siumu.
I le motu tele i Salafai o le a asiasi atu ia tamaiti aoga i le Kolisi o Mataaevave. Ma o le a maua foi se avanoa o i latou nei e asia ai se tasi o nofoaga tele ua atiae e Iapani i Upolu, o le nofoaga lea ua lafoai ai le otaota i Tafaigata.
O tupulaga a Okinawa ua tele tausaga o maua avanoa i faigamalaga faapenei ona o le manaoga o o latou taitai e lelei mo le silafia lautele o le fanau, galuega o loo faatino e lo latou faigamalo i lea taimi ma lea taimi.
O le tausaga na tea nei na talimalo ai lea motu o Iapani i taitai e ono o le Pasefika e aofia ai Samoa lea e ta‘ua o le PALM 6. O le fono lea a ta’ita’i e aofia ai Samoa ma Iapani e talanoaina ai le tulaga o iai fesootaiga ma fesoasoani e ofo atu e le isi atunuu i le isi.
O Okinawa ua tele ina faaaogā e atunuu e faatautaia ai fonotaga faavaomalo aemaise lava i le itu tau i puipuiga o le siosiomaga ma atinae tau fefaatauaiga i Asia ma le Pasefika ma o se tasi la lenei o auala ua manatu Okinawa e saga fafaga ai le iloa o ana tupulaga o le aga’i i atunuu eseese o le lalolagi, ma ia o latou iloa auala ua fesootai ai lo latou atunuu ma nofoaga eseese nei o le lalolagi. E mae‘a lenei asiasiga o Samoa i le aso 3 o Aukuso.