Taumafai Toomaga Laiti taofi sauaga i aoga

O le vaiaso atoa na faagasolo ai aoaoga ma faatalatalanoaga i aoga maualuluga i le talafatai o Apia i le taumafaiga a le Toomaga mo ē Puapuagatia Laiti e faalauiloa le leaga o le sauāina o tamaiti aoga e isi tamaiti aoga.
O le tele o ata ua faalauiloa i le faaoolima ai o isi tama aoga i isi, ua laga ai se faafitauli ua tele tausaga o feagai ma tamaiti aoga ae e lei faalauiloa lava ma fai i ai se faaiuga. O le maua o fesootaiga e pei o telefoni feaveai ua mafai ai ona faalauiloa nei sauaga.
O le faalapotopotoga laitiiti lenei a le Toomaga mo ē Puapuagatia, o le tupulaga talavou ua lesitala ma faatautaia ma o le tele o faafitauli e feagai ma tupulaga ua o latou galulue ina ia faatalatalanoa ma ofo atu i ai nisi o fesoasoani ina ia mautinoa e maua ai se filemu.
O le Kolisi o Maluafou, le Kolisi a le Ekalesia Faapotopotoga Kerisiano Samoa o Maluafou, le Kolisi o Samoa, le Kolisi o Sagato Iosefo ma le Aoga Matata Eseese a le Katoliko le Don Bosco na faagasolo ai le amataga o lenei polokalame.
O le faasologa o le polokalame ua avane ai fanau ua sauāina ma i latou ua faia ia faaoogalima ma nei faiga tau faafefe ua talanoa ma taumafai e ta‘u atu i tama aoga o loo faia nei uiga le leaga o le tulaga e oo i ai le toatele o fanau ua aafia ia latou sauaga.
E lē gata i lea ua iai tala ua tuufaatasia e le Toomaga mo ē Puapuagatia laiti ina ia mafai ona faamanino atili ai nei ituaiga sauaga.
O le tele o aoga a tama i tausaga ua mavae e foliga mai o se faiga lenei e talia lava le faamata‘u o fanau laiti e faatoa amata i le aoga ae e toatele tama aoga ua lē toe foi ai i nei kolisi ma o nisi e matutua foi ma faaauau nei amio.
O Kolisi e pei o Avele ua matuā malosi lava le sa‘o o faiaoga i le taimi lenei e asiasi ai i vasega ma mātau lelei lava gaioiga a tama aoga.
Na tuli e le aoga ni alii sa maua mulimuli o faia nei uiga o le tafasi o tama aoga laiti ma le taimi lenei ua leoleo atoa ma siaki e faiaoga potu aoga ma vasega matutua ina ia mautinoa e lē toe tulai mai ia ituaiga faiga.
O le kolisi a Sagato Iosefo le isi aoga na faapea ona molimauina ai faiga nei peitai e lei iai se faamatalaga ua faia e le aoga i lenei faafitauli e ui na faalauiloa solo e tama aoga ia  latou telefoni faiga a nisi o ta‘ita‘i i fanau laiti o le kolisi i Alafua.
O le vaiaso foi lenei e faaauau mai ai taaloga afeleti a Kolisi Maualuluga a le atunuu ma o le tasi lava lea o mafuaaga o le unai o lenei polokalame ina ia taofi ai le tulai mai o lenei faafitauli ua iso ai foi leoleo latou – o le vevesi ua tulai mai i le va o aoga. E lē gata i lea o le tulai mai pea o sauaga i totonu o aoga.
O le tausaga lenei faatoa toe ofi ai le Aoga a le Don Bosco atoa ai le Kolisi o Avele i taaloga afeleti nei i le mae‘a ai o le lua o tausaga talu ona faasala i le tulai soo mai ai o misa i le va o aoga.