Na maua se avanoa lelei e asiasi ane ai le susuga a Ross Robertson, o le sui o le Palemene mai le itumalo o Manukau East o le pati a le Labour, ma le susuga Kris Faafoi o le sui o le Palemene mo Mana, sui sooupu mo le Pacific Island Affairs, aemaise le susuga a Efu Koka o le sui o le iuni a faiaoga (NZEI) ma le aiga faiaoga o le Aoga St Peter Chanel Preschool i Otara.
O le auga o lea avanoa matagofie na mafai ai ona faasoa atu i nei sui nisi o faafitauli ma faafatuatama’i o loo feagai nei ma le Aoga Amata talu mai nisi o suiga e pei ona ua laulauvivilu ai nei le tulaga ua āfaina ai le tele o Aoga Amata i totonu o Niu Sila nei.
O le vaitau foi o le malosi o le polokiki ma ua asiasi solo ai lava faapenei sui i le Palemene i le fia maua pea o ni o latou soatau auā le taimi o faigapalota, ae a mae’a ane foi, e leai lava ni gaioiga e faia e tusa ma le faailoa atu pea i ai o le tele o manaoga o tagata lautele.
Ia na faapena lava ona faailoa atu i sui nei aemaise lava i le susuga a Kris Faafoi, mataupu e pei o le auga o le asiasiga ina ia ona faaoo atu ma faaleotele atu i le ofisa ma matagaluega pei ona galulue ai.
E iai le talitonuga o faafitauli lava ia ua tuuina atu o le a mafai tele ona penefiti ai Aoga amata uma pe afai e faataunuuina e tusa ai ma folafolaga ua faataatitia mai a i latou nei.
