E tusa ai ma se finagalo ua a‘e i le afioga i le Peresitene o le Koneferenisi Aoao Ekalesia Metotisi i Samoa ma atunuu i fafo, Rev Afereti Samuelu, ina ia asia matagaluega ma aulotu i Kalaiesetete e uiga i ni aafiaga aemaise o mafatiaga i totonu o aiga i le lotoifale ma le anofale talu le mafuie lea na afaina ai le aai i le aso 22 o Fepuari.
O le mafuaaga lea na tuua ai Ueligitone ae sii mai le fala siigata o le susuga i le Sea o le faasinoti i Niu Sila i Saute, Rev Sava‘i Loto e faataunuu le finagalo aemaise foi o sana molimau patino i mafatiaga o feagai nei ma nai aiga.
O le faletolu o matagaluega e aofia ai Hallswell, Addington ma Kalaiesetete o aulotu ia sa mafai ona oo i ai le savaliga a le faatamā o le Sinoti faatasi ma alii faifeau o aulotu, Rev Ale Palelei, Rev Poasa Leaupepe ma Rev Neru Tiatia.
Na faapea ona asia uma aiga taitasi i aso e lua na malaga mai ai ma mautinoa ai le toatele o nai aiga ua faaleagaina fale ma mea totino.
O nisi o aiga o loo nonofo faatasi ma o latou lava tauaiga a o tau saili se nofoaga mautu i le taimi nei.
Na asia falesa ma falelotu o le faletolu aemaise o maota o faifeau, ma alia‘e ai ni itu ua faaleagaina aemaise o mea totino a aulotu seia oo lava i fanua. Na faaalia e le susuga Sava‘i Loto lona lagona mafatia ina ua ia tagai ma molimauina le tele o le afaina, ae na ia saunoa faafetai i le leai o se soifua o nai aiga lotu ua maimau e ui ina ua maliliu nisi i lenei faalavelave, pau lea o le galuega a le Talalelei o le faamalosiau ma faamoemoe i le Atua e ui ina lē mautonu ma tau mate le faatuatua.
Na toe saunoa le susuga i le Sea o le a saunia sana lipoti ma tuuina atu i le afioga i le Peresitene o le Ekalesia, atoa ai ma le fuafuaga mo se fesoasoani e mafai ona maua mai e tusa ai ma aafiaga o le mafui‘e.
Na ia faaalia foi le agaga fiafia ma le faamalo onosai i aiga lotu auā e ui lava ina mafatia, ae o loo mau pea le toovae ma leai se lagona e see ese ma Kalaiesetete ma tau leai ai nisi o aulotu, peitai na maua e le tusitala e iai se tasi o matafale e oo atu le asiasiga a faifeau ma le alii Sea ua tapena uta o le a malaga i Aukilani.
Na toe taliu le faigamalaga a le susuga Sava‘i i le laumua i le afiafi o le Aso Lua, i le mae‘a ai o se taumafataga ma saunoaga taumavae, sa auai ai susuga i faifeau malolo o Lasalo ma Elisara, faapea tausi matagaluega ma sui o le faletolu aemaise nai tina na saunia le fofoga taumafa o le afiafi.
O le tofa Tumua Poutoa, o ia o le failautusi matagaluega a Addington sa fetalai e momoli le faafetai e tusa ai ma le malaga mai o le taitai o le sinoti, ae taatia atu ia i faiva alofilima o le afioga i le Peresitene auā o lea ua fola i malae le tofa faatamalii aemaise le tofa faale-Atua.
