O se tulaga faafiafia loto o le mafaufau, le tali manao lea o lo tatou Matai sili i le lagi, ona o ana faamanuiaga mo alo ma fanau a Samoa, o loo saili malo i atunuu i fafo, e ala i taleni eseese. O le faaiuga o le vaiaso o le masina o Mati aso 26 ma le 27, na faataunuuina ai le suega siamupini a Kuiniselani, i le taaloga o le Taekwondo Martial Arts, i le Brisbane Entertainment Centre.
O le alo o Samoa sa faamanuiaina i le pine auro, le susuga ia Alfred Joseph Frost, i le open heavy weight black belt division, ina ua taofia le fusuaga i le taamilosaga muamua. O Alfred faato‘ā toe fusu lea talu mai le 5 tausaga, talu ona mālōlō mai o ia, ona o taaloga lakapi liki sa feagai ma ia. Ma na amata ona toe koleni o ia, ona o lona fia fesoasoani o si ona tamā, mo le faiga o le latou kalapu, Frank Frost Taekwondo Australia, atoa ai ma lona toe fia oo i le maea.
O le iuga o le suega siamupini a Niu Sila o le 2011 – Kaino Fuataga Thomsen na manumalo ma maua le pine auro i le paga mamafa, fusi uliuli. O le alii lenei o le a fai ma sui o Samoa i taaloga a le Commonwealth i le masina o Aukuso 2011, lea o le a faia i New Caledonia.
E iai le talitonuga o le a toe faamanuiaina ai o ia i se isi pine auro e pei ona molimauina le faatupulaia pea o le tomai o le alii i le taaloga. Mo le silafia o le uluai Samoa lea na mauaina le pine auro i le taaloga a le Taekwondo i taaloga a le Vasa Pasefika lea sa faia i Samoa i le 2007.
O le susuga ia Fritz Thomsen na manumalo ma faamanuiaina i le pine siliva i le open middle weight, fusi uliuli. E toalima i latou o le a malaga faapitoa mai Samoa e tauva i le tauvaga tele o le a faia i Gold Coast i le masina fou o Me, taupule ola i le alofa o le Atua ina ia taunuu manuia lea faamoemoe.
O loo faalauaitele pea le tautua a le susuga ia Faalavelave Frank Frost ma faasilasila i le atunuu o loo maua pea avanoa mo i latou uma e fia koleni e puipuia le siosiomaga ma le soifua maloloina ina ia mafai ona lava tapena i taimi e osofaia ai e le fili.
Momoli foi le faamalo i lea alo o le atunuu auā e ui ina taumate e tagata poo ia o se Samoa poo se Saina, peitai i le faapotopotoga lava ia a Samoa i Kuiniselani ua toatele i latou ua molimauina lenei foi alo saili malo ma lana tautua.
