Asiasi le mafutaga Tama & Teine tuai ma ē sa Faiaoga i Kolisi Logoipulotu ia Namulauulu Pusa Fonoti – Levin Ueligitone

Fai mai le tala o le seuga lupe a Letufuga ma lona soaseu na afua ai le upu lenei, “Ua tafafao taliga o tufuga uli.” Ioe sa tafafao taliga o tufuga uli pe o le a tua ma ni ā le faamoemoe sa lupe o le Asosi o faiaoga, teine ma tama tuai o le Kolisi o Logoipulotu mai le motu tele i Salafai, e pei ona sa agiga i malae.
Fai mai e lei avea le gau ai o le laau seulupe a Letufuga i uta o Futiga, e latalata i Logoipulotu, na avea ma mea e vaivai ai i le siitaua atu ia Aana ma lana siigataua. Ui foi ina augani pea le soaseu ina ia toe foi ia e faaauau le seuga, ae sa tali mālie pea le alii, “E lē mafai ona ta toe foi ona ua latalata mai tai, pei ona faaigoa ai lea auala i Safotulafai, o Sa-Le-Foi.”
Ui ina sa iai foi le u-taafale, o le moemoenoa ma le laufale‘aina, e ala i finagalo sa fesiligia ai le mafuaaga ua toe lalaga ai lenei Asosi, a o le upu e fai i laau o le vao, e tofu le laau ma lona aogā, e lē falala fua foi le niu, sei vaganā ua tetele le savili.
Ua faatusaina foi pe a tau lau o se faamoemoe  o le laau lea o le soifua, ina ua malaga atu le mafutaga mai Aukilani e agai atu i Levin, Ueligitone ma feiloai ma le tamā ona o lenei  nei faamoemoe.
E ui i suiga o le tau ma le mamao o ala, ae na faalaolao e le Atua peau laga vale o le ala i le taeao o le Aso Toonai, 1 Iuni, 2013, na avea ma taeao faitauina o le soifua tautua o le Afioga ia Namulauulu Pusa Fonoti, ina ua toe feofoofoa‘i i loimata o le fiafia & lagona i lona maota i Levin, faatasi ma le Afioga i le Peresitene, Sooalo Setu Mua & laulau aemaise o le Asosi a Logoipulotu Tuai mai Aukilani na malaga atu.
O le fia faatāuaina e tama ma teine na utuvai i Logoipulotu le tautua matavela a le tamā ia Pusa poo le fetalaiga ia Namulauulu. O le aso 1 lenei o Iuni i tausaga taitasi, sa faamauina ai i le talafaasolopito le sao o le Afioga ia Namulauulu Pusa Fonoti, e ala lea i lona faamalosia o le auai ai o Logoipulotu i tausaga uma, i savali faaaloalo o le Tutoatasi o Samoa i lona malae o le faautugatagi i Tiafau, o se taulaga mo Samoa, a o lei tapunia ma faaiu faiva alofi aao faafaiaoga i le kolisi.
Na molimauina foi le mau iu maea pea o le tofa ia Namulauulu i le aganuu ma le faasamoa e pei ona taualugaina ai foi le vaiaso o le gagana Samoa i lea aso 1 Iuni 2013. O laei Samoa o le fanau ma le ekalesia na vaaia ai ma molimauina le faautaga mau o loo ia Namulauulu Pusa. Ua taunuu ai le upu, ‘E lei faoa le ‘iliai‘a’.
Na aliitaeao le paia i aiga, ma usu faaaloalo le mamalu o le faleupolu aemaise le Ekalesia i Levin, ina ua taunuu le malaga. O le Tofa ia Maloi‘umai Sanele Leilua sa folafolaina ‘ava o le usu, a o le Afioga i le Peresitene sa lauga tali, ona sosoo ai lea ma tu ma aga masani a Samoa aemaise o faaaloaloga.
I lau Tofa Namulauulu Pusa & faletua ia Ana Fonoti, le paia o le ekalesia, aemaise o le aiga alii, o la Seepa, “Ua itiiti mea na matou faalogo ai nai lo mea ua matou vaai i ai.” O lou titi faitama ua e sasaa faaoti le utu a le faimea. Ua e sii le Peresitene lea ma le Asosi i le maa salafa, ua e sii foi le fale o Asomua i luga o le mauga, ae talofa, poo ai ea i matou ua e gaseā ai ma ua e manatu mai ai, e ala i le ulufia o outou aao ma gapatia i faaaloaloga faatupu sa outou maau i ai.
Faafetai i lo outou agalelei ma le talimalo faatamalii. Leaga matou te lē tau selu atu auā e masani le tamalii i ana aga faatamalii, e masani foi le tupu i ana aga faatupu. Talofa ua lē gata ua tala measina e ala i le ‘ava paia & le mamala… fai mai o le ‘ava e fai lona gafa, a ua outou satia mai auvae mauga ona e faigata le fesilafaiga, ua tatala foi le auafa & toga paia, aemaise o palapala a malo na faatino ai lo outou agalelei aemaise lo outou titi faitama ia Logoipulotu.
Faamalulu atu foi pe afai ua lē ‘a‘u lo‘u pale, ua lē soo foi lo‘u titi i se meaalofa sa tauaaoina mo oe le Tamā & aiga. Tau ina ia toe faatutumu e le Atua a outou kate i le mau ma le manai sili mai ia te ia. Tatou tau fai tatalo pea i lona agalelei faasoa mai, ia toe maua ai se isi laolao tatou te toe feiloai ai. E lē faagaloina lava Afi‘a i si ona vao Namulauulu ma le tatou mafutaga.
Faamanuia tele le Atua i lau Afioga & faletua, maua pea le Atua manatu auā le feagai ai ma le fafagaina o le lafu mamoe a le Atua. Soifua maua, i le Peresitene & Asosi a  Logoipulotu, ae ola le tautalaga mai Avea e tua i ai Fuifatu.
Faafetai lava…failautusi o le mafutaga (N.B) …o le failautusi o le mafutaga o le faletua poo le tofa ia Talalafai Salu Senia Tuputala.