Ua lagomau nei i lona aiga i Laulii le afioga i le Sa‘ofaapito le afioga Leniu Tofaeono Avamagalo, ina ua faamanavaina e le Atua ana galuega i le olaga nei i le 85 o tausaga o lona soifua.
Sa tumutumu le toatele o aiga ma paolo faapea ma uo ma ē masani i ona toe sauniga, aemaise o taitai o le Malo mai lava i le Ao Mamalu o le Malo e oo i le Palemia ma lana Kapeneta ma sui faipule o le Palemene.
O ia o se tasi o tamalii sa seei ma tusi aao i ai le itumalo o Vaimauga i Sasa‘e e avea ma faipule o le Palemene mo paeaiga sosoo e lua e amata mai i le 1991 e oo i le tausaga e 2001.
O ia paeaiga e lua e tailima tausaga sa filifilia ai le Afioga Leniu i le kapeneta, ma sa molimau ai le taitai o le Malo i le Palemia i le tele o luitau faigata sa feagai ma ia a o tulai i le tofi o lona itumalo ma avea ma se tasi o minisita o le Kapeneta.
O le vaitau lea o loo avea le Tootooalii le afioga Tofilau Eti Alesana ma Palemia seia oo ina tuumalo ae faaauau mai ai e le Susuga Tuilaepa Sailele Malielegaoi i le faigapalota tele o le tausaga e 2001 lea na muta ai lona tofi faipule.
O taimi ia o le tele o faigata tau upufai i finagalo faaalia o taitai i auala e faagaioi ai le Malo lea na saunoa le Palemia i lana molimau, na oo ai lava ina solo tetee nisi tagata faasaga i le lafoga o le VAGST, ma molia ai se nusipepa i faasalalauga malolosi na faaosofia ai le loto ita ma le inoino o tagata i le taitaiga o le Malo i lea vaitaimi.
E tuumalo nei le Afioga Leniu Tofaeono Avamagalo, o loo iai pea i le komiti mo faailoga ma pine taualoa a le Malo. O le vasega o le malu o le Malo na faatinoina sauniga faalemalo mo lea taitai i lona tuugamau faapea le tauaveina o lona Sa i sauniga i le malumalu o le Ekalesia EFKS i Laulii.
