“E manatua pea e tamaiti lenei aso, e lē mafai ona galo”…pule aoga, Leata Tipi
O le saunoaga lea a le tamaitai pule o le aoga amata a Leataata o Tupulaga, ina ua sauni le aoga e toe foi mai i lona nofoaga i le itu i Sisifo o Aukilani, ina ua mae‘a la latou asiasiga faapitoa, sa asia ai le faatoaga a le afioga ia Tuilaepa ma lona faletua ia Eseta Kovati i le aai o Waiuku.
O se saunoaga e moni ma e faamaoni foi, auā o loo iai lava le talitonuga e faapea o fanau, o meapueata mo le lumanai.
O le malaga faapitoa o le fanau e molimauina ma asiasi foi i le aave mai o tala o le faatoaga a le Kovati and TamYam Ltd, o se vaega o le a‘oa‘oina atili pea o mafaufau o le fanau, e pei ona sa ta‘ua e le afioga i le pule aoga ma faiaoga.
O lesona a tamaiti i aso taitasi o loo a‘oa‘oina ai le ‘ai o mea‘ai paleni, aemaise lava o le faamalosi ina ia fiafia e ‘ai fualaau ‘aina ma fualaau faisua, atoa ai ma fualaau taumafa mata.
E le gata i le a‘oa‘oina o le fanau i lea lesona aogā, ae ao lava foi ona tagotago le tamaititi ma vaavaai i le mea moni, poo le mea faitino foi, auā e masani lava ona faaaogā e faiaoga ata tusi poo ata foi e pueina, e tau faamatala ai le lesona ma lona uiga.
O lona uiga e tāua tele i tamaiti le faalogo, matamata i ata, ae silisili ai ona tāua tele le tagotago i ai ma vaaitino i le ata sa matamata ma faalogo i ai.
O nisi ia o mafuaaga sa mafua ai ona faamalosia tele le tamaitai pule ia Leata ma le aiga faiaoga, o le aoga amata a Leataata o Tupulaga, e ao lava ina alu se malaga a le fanau se‘i faatino ai a‘oa‘oga o loo a‘oa‘oina ai, ma e iai lava le talitonuga, o le a totoina i loto o tamaiti ma o le a lē galo foi i o latou mafaufau le uiga ma le tāua o lea aso na faataunuuina.
E lei iai se mea na toe gole ina ua taunuu le fanau; e fai o totonu o fale o loo totōina ai le tamato, a o isi foi vaega o le faatoaga, ma e leai lava foi se isi lagona sa iai, ua na o le fiafia ina ua tago ma pa‘i, atoa ai ma le vaaitino i le tamato a o fotu mai ma fua mai.
O le tamato o loo faaaogāina e fai ai le sanuisi ma fai ai le kuka a le tina, a ua vaaitino i ai, aemaise o lona totoina.
Na taualuga le faamoemoe o le aoga i le faia o le taumafataga o le aoauli, ia ma faia ai loa ma se latou aitema faapitoa lava mo le aiga e ona le faatoaga. O le siva a le Manu Samoa, faatasi ai ma isi siva Samoa, sa taualuga ai le aso matagofie o le fanau i Waiuku. Na saunoa foi le pule aoga, faletua ia Leata Tipi e faafetai ai Tuilaepa ma Eseta, ona o le avanoa sa tuuina mai mo le fanau, ma tuuina foi i ai se mealofa tupe mai le aoga e faaopoopo i le faafetai mo lea aso.
O le faatoaga a le afioga ia Tuilaepa ma Eseta e tusa ma le fa eka, ma o se vaaiga maoa‘e foi sa molimauina ona o le taugatā tele o le tulaga ua iai nei le taumafaiga a lenei aiga.
O le fale ua faapitoa lava mo le totōina ai i totonu o laau ‘aina e tusa lona tau ma le $190,000 faaopoo i ai ma le lafoga.
O le fale ua fausia faaonaponei, ma ua fuafua foi i ituaiga tau e fa o le atunuu o loo iai. O totonu ua mae‘a foi ona tuuina i ai mea uma e manaomia mo le tausia ma le vaaia o fualaau ‘aina. E ese foi lona tau sa faatinoina ai, o le tuufaatasiga o le tupe sa faaaluina ua silia ma le kuata miliona tala lona tau aofai mo le fale e tasi.
E tusa ai ma le saunoaga a le susuga ia Tuilaepa sa ia ta‘ua ai e faatolu ona tau le tamato i le vaiaso, ma o le tauga e tasi e tusa ma le 1000 tone le mamafa, ua iai foi le taavale faapitoa i totonu o le fale mo le faagaioia o le galuega mo le tauina o le tamato. O loo ua iai lava foi kamupani ma le maketi faapitoa o loo faatalitali ane mo le tamato mai le Kovati and Tam Yam.
