“O le mua foi na matou o mai ai ae lē o se isi lava tulaga”, Va‘amua Henry Sesepasara, kapeteni o le Aeto mai Pago Pago
“Ua sau sauni le Aeto i lona valaaulia auā o le mua o loo taulai i ai tapenaga a a‘u nei ma le auvaa”.
O le finagalo lea o le kapeteni o le Aeto le fautasi mai Pago Pago i Amerika Samoa na siamupini i tuuga fautasi o aso faailogaina o le Fu‘a a Tutuila i le masina o Aperila lea na auai ma le Segavao II mai Samoa Tutoatasi.
Faaalia e le kapeteni le susuga Va‘amua Henry Sesepasara, lona fiafia tele i tapenaga a le Komiti o tuuga fautasi i Samoa, ma ua ia taliaina foi tulafono mo le alofaiva i le faamoemoe.
O le Aso Gafua o le vaiaso nei, 31 o Me 2010 (taimi i Samoa) o le a faatino ai le tuuga fautasi a o lumanai le sisina a‘e o le Fu‘a o le Malo Tutoatasi o Samoa i le Aso Lua aso muamua o Iuni.
“O le vaa lenei o le Aeto o se fausaga fou e ta‘ua o le high-tech ma e toatele ua latou silafia le saoasaoa tele o lo matou vaa.
O le mua foi na matou o mai ai ae lē o se isi lava tulaga”. O le saunoaga lea a le kapeteni ina ua fesiligia.
E lei manao le tamaitai kapeteni o le Segavao II le afioga Vaimasenuu Zita Martel e faaali sona finagalo e tusa ai o tapenaga o le latou fautasi, ae o lana tala mai e faatali sei oo i le aso o le faamoemoe.
Na faaalia e le susuga Va‘amua o le uiga tonu lea o lona suafa, o le mua o le Aeto ma o le sini lava lea o loo tapena i ai.
E 4 fautasi o le a tausinio i le tuuga faavaomalo e faaaogā ai foe sipuni lea e tauva ai le Aeto faatasi ai ma le Segavao II, o le Lā o Samoa mai Lepea.
O le fautasi o le Tamarina o loo fia auai i le tuuga lea, peitai ua lē talia le latou talosaga e faaaogā a latou foe Samoa.
O le Sa o le Ulalei mai Vaiala o loo mautinoa e auai i le tuuga lava lea e tasi, peitai ua ofo e le kapeteni o le Ulalei a latou foe sipuni e faaaogā e le Tamarina i le totogi e $10,000.
A talia e le Tamarina ona alu lea o le Ulalei i le tuuga o fautasi e taualo i foe Samoa. E lei mautu poo ai o fautasi ia e lua e alu i le foe Samoa ma le tuua faavaomalo e alo i foe sipuni.
O Sa ua mautinoa e tausinio i le tuuga e faia i le aloalo e amata mai i Fogaa i Faleula o le Littlerina, Tama o le Lava, Fetuolemoana I ma le Fetuolemoana II, Punialavaa, ma le fautasi o Le Lupe.
E fitu Sa mo le tuuga lea, peitai o loo faatali le feutanaiga i le va o le Tamarina ma le Ulalei i le itu i foe.
Ua faamalosia le tulafono na faaiugafonoina e le Kapeneta i le tausaga e 2008, o le tatau lea ona ausia e fautasi uma le oo i le tini i totonu o le 45 minute ona faato‘ā mafai lea ona maua se faailogatupe.
O lona uiga a oo i le tini ua tea i tua le 45 minute, e leai se faailoga e maua e pei ona toe faamanino e le taitaifono o le soa komiti o tuua fautasi.
