Ina ia saga popoto atili faiaoga e aoaoina fanau ale tatou atunuu, o aooga ile Iunivesite aoao a Samoa i Vaivase NUS, ole faamoemoe lea ua taunuu mo se vaega o faiaoga. Ina ua toe taliu mai ai nei ile Iunivesite talu se taimi na o atu i fafo e faalautele mai ai lo latou tomai, i mataupu eseese.
Lea ua faalauiloa ai ile vaiaso nei o latou faailoga mai Iuniveste eseese, e aofia ai Victoria, Otago ma Aukilani. Ua aloaia ai nei foi ma le tofia ai ole Dean of Nursing le Susuga a Tasese sa ile vaega o tausi soifua lesitalaina. I faamaumauga talu ona faavae mai le aoga faafomai faatoa iai lea ose Dean fou ole Nursing lava ia. O lea foi aso na aloaia ai le taliu mai o nei faiaoga ma o latou failoga maualuluga.
Toe aooga faiaoga
E le na’o faiaoga ole Iunivesite na toe aooga ia popoto atili. E oo lava foi i faiaoga o kolisi ma aoga tulagalua, na toe aooga foi le vaega sa naunau e siitia o latou tulaga tau aoaoina. Ua faamauina e le gata ina siitia ai le tulaga faafaiaoga, ae ole a ogatusa lava foi ma le totogi ua atofa mo faiaoga ma o latou tomai. O mataupu sili ona manaomia ai faiaoga ina ia toe aooga i latou o lena matata, ole Faasaienisi ma le Numera.
Na ave ai avanoa i faiaoga oloo aoaoina ia mataupu, i taimi sa tuua ai aoga, e malaga mai ai ile Iunivesite e toe ave ai a latou pepa. Ua faamalosia lea faiga ona ole maitauina pea ole faaletonu o maka o tamaiti i mataupu o ta’ua i luga, ma taumafai ai loa le malo ile toe faaaoogaina o faiaoga aemaise oi latou oloo a’oa’oina le Faasaienisi.
Ile talanoa ale Susuga Samuelu ose tamalii ua loa tausaga talu ona faiaoga ile matata eseese ile NUS, ua tele faiaoga ua toe maua avanoa e faiaoga ai. Pei foi ona toe maua ai lona avanoa e tufa atu ai ma fesoasoani ile aoga tulagalua i lo latou pitonuu. Ua molimauina foi le tele o faiaoga, ua savalia le sefulu tausaga talu ona litaea, ae oloo mafai lava ona faaaogā o latou tomai i aoga tulagalua.
Ole sioti ai o faiaoga ose ma’i taatele lea i aoga ale malo, e pei ona molimauina i aoga tulagalua ile motu tele i Savaii. Oloo maua ai lava aoga tulagalua, e na’o le toafā faiaoga. O isi aoga e lata ile 200 tamaiti ae na’o le toaono faiaoga. Ma ua viia ai e faiaoga o aso nei le avanoa oloo latou maua i luga o polokalame o lagolagoina ele matagaluega o Aoga, lea e aooga mo le faalauteleina ole tomai, ma faaauau pea ona faatino o latou tiute faafaiaoga i totonu o aoga oloo galulue ai.
O nei avanoa ua mafai ai ona sue ai le tikeri ile faaaogāina o nei avanoa tāua. Na talanoa ai le tamaitai faiaoga ia Tau Tanielu, ile manaia tele ole faiga o polokalame ma course mo latou o faiaoga fulltime aemaise o faiaoga i Salafai.
E alu atu sa’o lava le polokalame i luga ole internet, ae faatoa o atu lava tagata mai le matagaluega e feiloai ma latou auā le faaleleia atili ole polokalame i taimi e pei ole faaiuga ole vaiaso.
O mataupu e aofia ai le English, Science, Social Studies, ma isi mataupu ua mafai ai nei ona toe maua avanoa o faiaoga e aooga ai ma saga popoto atili ai. Ole faaletonu ai o faaiuga o suega a fanau aoga, lea e talitonu le Kovana o Amerika Samoa ua tuumalo, ia Sunia, afai e alu atu lau tama ma le F i lona lipoti poo le D foi, e le ose faaletonu lena o lau tama ae ole faaletonu ole faiaoga.
