Faamata’u le Penisula i Mulinuu

Ose tamaitai turisi oloo savalivali ile taligalu ile vaega tonu o Mulinuu ua faamamafa nei iai lapataiga a leoleo
Ose tamaitai turisi oloo savalivali ile taligalu ile vaega tonu o Mulinuu ua faamamafa nei iai lapataiga a leoleo

Ua lē tasi pe lua ni soifua e ma’umau i Mulinuu e afua mai ile le faautagia o faailoilo oloo iai mo le saogalemu.

Ua vaiaso ai nei talu ona malemo mai ai se alii talavou mai le afioaga o Vaiusu, e ui ina taunuu atu iai fesoaosani, ae na tuai lava.

O molimauina ose tafaoga a lea alii ma nisi o uo na afua ai ona oo ile sami.

Ma ua toe faamanatu mai ai nei ele ofisa o leoleo vaega tonu lava i Mulinuu e tatau lava ona faautagia ele lautele, e pei lea ole itu oloo iai le aoga a Seila poo Malini.

Na saunoa ai le Susuga a Samia ole ofisa o leoleo, “Ole vaega tonu lava o iai le aoga ale Malini, ua matuā faasāina lava, e oo foi i tafaoga ile taligalu lea.”

Ole mafuaaga ole popolega ole matagaluega ole puipuiga, talu ai ole vaega sami lea na toe eli ina ua faia ai le aoga mo Malini ma le latou tamai uafu oloo iai.

Ua molimauina e leoleo ole tulaga o iai ua matuā loloto lava e pei ona ave nei iai le faamamafa o fautuaga.

O lea nofoaga sa pei e taututuu iai avetaavale ma latou pasese, ae o aiga i lalo o paolo o fetau ma pulu i tua ane o loa poo tuugamau o iai i Mulinuu, i soo se taimi ole aso, ae ua lē o toe tutusa:

Na talanoa Samia, “E le o toe manaomia ai se taelega auā e iai tagata na maliliu ai.” Ole faamamafa ale matagaluega o leoleo, oloo ave lea ile au taeele aemaise o tagata e le iloa feausi. “Na’o na e tu atu lava faapea oe o e aau ae leai ua e tafea, ua ave oe ele malosi ole tatafe ole āu ile itu i Sisifo.

Ua molimauina le tele o avega a tafega ale Peninsula i Mulinuu oloo faamauina, e aofia ai tagata matutua ma tamaiti na tafafao, ose alii faipisinisi na fagota ofe ai na maliu ai foi. Ua saga faamamafa mai ai nei le puipuia ole saogalemu i lea vaega ole sami o Mulinuu.

Ole alii faifaiva lea e pei ona molimauina e ona tauaiga, e masani lava ona fagota savali agai i tai.

Ole taimi mulimuli foi na alu ai e fagota, sa faamau lava le float i lona tua, peitai o na metotia faaonapo nei, e le tatali lava pe a oo ina ita le sami ma lē ogatusa ai ma fuafuaga ale tagata.

Na alu le po o saili lena alii faipisinisi, peitai na maua lava ile vaega o to’a iai tafega o āu aave o Mulinuu agai i Sisifo.

O isi vaega ole taligalu i Mulinuu i tafatafa ane ole fale vaai tau, oloo molimauina e leai se faamalosiga e faasā ai tafaoga, vagana ai le pito ile aoga Malini ua faamalosia iai le tapu o tafaoga.

I Mulinuu, ua fai ma toomaga o aiga e tafafao iai, aemaise ai o aso malolo, faasolo mai le papa’u i luma ane ole Round about, ma faasolo ane ai ile itu i Sasa’e i luma ane ole kalapu o vaafaila le Apia Yacht Club.

E ui ole tapu ile pito ile o iai nei le aoga ale Malini, peitai oloo faamalosia foi e leoleo ona taofia le toe tafafao umi ai tagata ile leva ole po ile taligalu.

Ua maitauina le asiasia pea e leoleo o taligalu i po uma lava ma fautuaina tagata e inu ‘ava ai ina ia tausia le filemu ma agai i aiga.

Ole taligalu foi lea ua fai ma malae koleni ole toatele ma savalivaliga o vaveao ma afiafi a malo mai fafo, faapea foi o tatou lava tagata.

Ole taligalu foi lea i tua ane ole fale o Pulenuu, ua fai ma nofoaga e faamautu pe fetaui ai foi le vaega foi lea e piki ai iina e avetaavale ma le au Asia e pei ona molimauina teine ole taulaga.

Ole taligalu foi lea i tua ane ole nuu o Tulisi, na fausia ai le Ala ole Alofa, sa totogi ai tupe a tagata maumea ole tatou atunuu, ae tusi o latou suafa i piliki o fau ai lea ala, ma soli e tagata e feoai ile ao atoa ma le po.