Ua faailoa mai e le Ofisa Sili Lagolago o le Matagaluega o Faatoaga ma Faigafaiva Misa Konelio le amatalia ai lea o le laasaga lona tolu o le poloketi a Saina.
E pei ona silafia o lenei poloketi ua matuā iloga lona tulai mai e tali atu i manaoga o le au fai faatoaga laau aina.
O le aotelega o lenei faamoemoe o metotia ma auala eseese aemaise ai o fautuaga tatau mo le atinae o fualaau aina.
Saunoa Misa e faapea, o le laasaga lona tolu lenei o le fausia o le pa e siomia ai le fanua e 20 eka faatasi ai ma potu fono mo aoaoga mo le au fai faatoaga.
Ua faailoa mai foi o le a fausia nisi lala se 10 mo lenei lava poloketi mo nuu i tua e aofia ai Upolu ma Savaii.
O le agaga maualuga o lenei faamoemoe e pei ona saunoa Misa, ina ia faafaigofie i fai faatoaga i nuu i tua ona agai ane i lala nei o le a faatutuina ma auina atu ai laau moomia mo le totoina mo a latou atinae.
Ua le gata foi i lea ae o le faamoemoe autu o le faalauteleina o lenei polokalame ina ia mautinoa le maua uma e le atunuu o nei fesoasoani.
I se suesuega a le Matagaluega faatasi ai ma ana asiasiga i faaiuga o masina o le tausaga na se‘i mavae atu nei, na mautinoa ai le maualuga o le siitia o le fuainumera o fualaau aina na faatauina.
“I nei lava taumafaiga a le Matagaluega na mautinoa ai le tulaga lelei foi ua iai faatoaga fualaau aina mo le motu o Savaii pe a fua i tausaga ua alu.”
O le faatutuina o nei lala e 10 o lenei poloketi na saunoa ai Misa o le a tilotilo lava i ai le Matagaluega mo le fetuunaiga mo Savaii ma Upolu.
E ese mai i le poloketi lenei na faailoa mai ai foi le tulaga matautia ua oo nei i ai le talo a Samoa mo maketi i Niu Sila.
Na faailoa mai e Misa a fua i le tulaga lea ua iai le tatou talo ua lata mai le taimi e oo atu ai i le 10 konetaina e auina atu i Niu Sila i totonu o le vaiaso. I se ripoti a le Matagaluega na faailoa ai o loo lava pea le talo i le taimi nei e tali atu i manaoga ua iai maketi aemaise lava i Niu Sila.
