Ua savalia nei i le tolu tausaga o faia pea lenei mafutaga mafanafana i totonu o le aiga o le Atua i le PIC i Manukau.
O lea faamoemoe maualuga, o le faaauau pea lea o le mafuta faatasi o mātua ma fanau ina ia maua ai pea se mafutaga mafanafana ma ia saga faamausali ai foi ma le femalamalama ai o mātua ma fanau i totonu o le galuega a le Atua, auā e lē gata i totonu o aiga, le mafutaga ae ia avea foi le ekalesia o se isi aiga na te fausia se isi pou malosi e faamalosia ai lava le aiga.
Auā o le talitonuga o le susuga i le faafeagaiga ia Karima Faiai ma tiakono o le Ekalesia, e lē lava le taimi o le lotu e maua ai lea mafutaga, ae ia avea se isi avanoa faapenei e fausia ma tatala ai se polokalame e fai ma taiala e aoaoina ai pea fanau i le tu ma le aga faa-Samoa e pei ona taumafai mai ai mātua, aemaise o lenei vaitaimi ua lē faigofie tupulaga, e iai taimi ua fai ai le filifiliga ma le faaiuga a le tama ma le teine talavou ma avea ai ma mea ua lē toe o ai i ni lotu.
Ae o le mafuta faatasi ma tu‘itu‘i malosi pea i fanau e maua ai manatu ma lagona lelei e faatinoina ai se galuega lelei i totonu o le aiga ma le Ekalesia. O le sini autu o le faamoemoe o lenei tausaga, poo ā ni taleni ma ni agavaa e manaomia e taitai, e taitaiina ai le Ekalesia i ana polokalame fai ma ona itutino uma i lenei vaitau ua tatou iai.
E tolu aso sa faatautaia ai lenei mafutaga, o le afiafi o le Aso Faraile na tatala i le aoaoina o fanau i le faatinoina o le aganuu faa-Samoa, aoao le ta‘iina o le sua o le tagata e patino tonu i lea galuega, o le folafolaina o faaaloaloga faatasi ai ma isi vaega o le aganuu a Samoa na galulue faatasi ai le susuga i le faafeagaiga ma mātua o le Ekalesia.
O le taeao o le Aso Toonai na alausu ai i le tafaoga ma taaloga e pei ona masani ai, ma faaauau ai pea lea mafutaga i totonu o fanau, ae o le afiafi na faatino ai loa le po fiafia mo vaega uma e fā sa vaevaeina i ai le Ekalesia. O le lanu Moana, Mumu, Meamata ma le lanu Samasama, o vaega ia sa faatino agai i ai le faamoemoe i le faaiuga o le vaiaso.
O le taeao o le Aso Sa na taualuga ai loa lea mafutaga i le faatinoina o le gaseseina o le suavai, faailoa i fanau le pusaina o le umu, vavaluina o talo, ma le ofuina o luau, ma faaiu ai loa i le sauniga atoa o le Aso Sa ma tapunia ai loa le faamoemoe e pei ona alo i ai le Ekalesia PIC i Manukau.
O le saunoaga a le susuga i le faafeagaiga ia Karima Faiai, ua telē le suiga o lenei polokalame talu ona faagasolo mai. O le tausaga muamua sa tele fanau na lē auai, o le tausaga lona lua sa amata loa ona agai mai nisi o alo o le Ekalesia, ae o le lona tolu lenei o tausaga ua vaaia ai loa le toatele o mātua ma fanau ua latou faatāuaina lenei faamoemoe.
O amataga o tausaga uma lava ua tuu agai i ai lenei mafutaga ona e fuafua agai i ai taiala ma polokalame a le Ekalesia mo le tausaga.
