E oo lava i le Aso Faraile mulimuli o le faaofi atu o autaaalo o le Taamilosaga a le atunuu mo le Lakapi Taitoafitu, o agai atu lava kalapu eseese i le Ofisa o le Iuni Lakapi i Malifa auā le faaulufale atu o au mo lenei tausaga ma lana taamilosaga. Faaalia e le tamaitai sui sooupu o le Iuni Lakapi a Samoa o Leto‘alepai Rulla Vaai, e uigaese le maualuga o le numera o au tausinio i lenei tausaga lea e fesootai atu i ai, ua oo i le 48 le numera o au.
O le faaiuga o le vaiaso na fono ai le Iuni ma sui o Kalapu eseese o le Taitoafitu o le Lakapi ona o le faataatitia lelei o le taamilosaga ma na manino ai o le ausia e Samoa o le Siamupini i lea Taaloga i le Lalolagi atoa, ua avea ma auala ua saga unaia ai le fiafia o tupulaga o le atunuu e tausinio i le Lakapi lava ia o le Taitoafitu.
E lima vaiaso o le taamilosaga lenei lea foi e feoai ai au taaalo i itumalo eseese mo le faatautaiga o taaloga eseese.
E aofia i ia taamilosaga taaloga e faatautaia i Aleipata, le Itu o Tane, o Malisi poo Apia i Sisifo faapea ai le Apia Park.
E $100 le lesitala o le taamilosaga e tasi ma o feoaiga uma lava e fesoasoani i ai le Iuni Lakapi a Samoa, peitai o le tele lava o le seleni o loo faamoemoe foi i Kalapu taitasi ma e ui i ia tulaga o loo manino lava le lagolago a au taitasi i lenei taamilosaga.
O le lakapi Taitoafitu a Samoa o le vaega lea o lea faagatama ua maualuga le vaavaai i ai a le IRB le Pulega o Lakapi Faavaomalo, peitai o le Taitoa Sefululima lea o loo ua tele i ai faitioga a le Pulega, e pei ona iai se lipoti na faalauiloa talu ai nei ua sau atoa ai ma faitioga ma auala e tatau ona vaavaai i ai Samoa ma lana Iuni faatina e faatautaia.
O le popolega o le IRB o le tele o le tupe o loo sasaa mai i le atina‘e o le Lakapi i Samoa ae o le Taitoa Sefululima o loo ua vaaia le laitiiti o se atina‘e o iai.
O le mau a le IRB e lē toe talia lava le agai atu o le Manu Samoa tele i taaloga o le Ipu o le Lalolagi lea e talimalo ai Niu Sila i le tausaga fou pe a lē lelei le taaalo a le au a Samoa.
Ua mautu le nofoaga mo a‘oa‘oga e fafaga mai ai au taaalo a le atunuu e pei ona iai le Aoga lea e i le Iunivesite o le Pasefika i Saute i Alafua, ae o le manatu a le IRB, e foliga mai e lē o iai se suiga i le taaalo a le lakapi Taitoa Sefululima.
O le tuutuuga la lea ua iai nei, ia iai se suiga i le taaalo a le Taitoa Sefululima i le Ipu o le Lalolagi; a leai e ono aafia le aoga lakapi lea ma le seleni e toe tatala mai e le IRB mo le atina‘e o le lakapi Taitoa Sefululima i Samoa.
E amata Taamilosaga o le Lakapi Taitoafitu ae ua tuua le atunuu e le aufili Taitoafitu a Samoa lea ua agai atu i Initia mo Taaloga a Malo o le Taupulega, e lē gata i lea o le a faapea foi ona taaalo i Ausetalia.
O loo faagasolo foi le taitoafitu a le Iuni Lakapi a Tamaitai lea ua vaaia le toatele foi o tamaitai ua mananao e tausinio ai.
E lua vaega o loo vaevae i ai taamilosaga lakapi nei a tamaitai o le vaega a tagata matutua ma i latou e i lalo o le 21 tausaga le matutua.
Talu nei ona amata taaloga a tamaitai, ua vaaia le toatele ua faaali le manaoga e faaauau le taamilosaga lea ua faaopoopo ai nei loa isi taamilosaga e lua faato‘ā faatofa foi lea i tausinioga o le lakapi a tamaitai.
