Amata le folasaga lona lua Tala Faatatau o le Tupe

O le taeao ananafi, Aso Gafua lea na toe usuai ai le Fono Faitulafono i le Palemene i Tiafau auā le tolaulauga lona lua o le Tala Faatatau o le Tupe a Samoa mo le 2012/2013.
O se tala o le tupe ua laualuga ai le tele o galuega ua fia faamae‘a o le afā o Eveni ma ua iai ma le taumafaiga ina ia tuuitiitia lava le soona faaalu o tupe ae agai i le faamae‘a ai galuega ia na faaauau mai i le tausaga ua tuanai.
E pei ona saunoa le Minisita o Tupe le Afioga Faumuina Liuga i lenei mataupu, o se taimi faigata lenei ma e ui i le tulaga faigata o iai le tamaoaiga o le tele o atunuu o le lalolagi, o Samoa lava le isi tamaoaiga ua taumafai lava ina ia mafai ona faasoa lelei lana tala o le tupe.
O le mau a le Itu Agai ua mafai ona faaauau le faasoa a le Malo o Samoa ona o fesoasoani tau tupe ua maau i ai atunuu tetele o le lalolagi.
O le faigata la na ta‘ua e le Tautua Samoa ona o le tele o le aitalafu ua faatuputupulaia pea lea ua ta‘ua ua oo atu i le 100 miliona tala ma o augatupulaga o Samoa i le lumanai o le a feagai ma le galuega tele o le taumafai lea e totogi nei aitalafu a le atunuu.
O loo ua iai le folasaga ua mae‘a faalauiloa e le Minisita o Tupe o le a leai ni lafoga e toe faaopoopo i lafoga a le atunuu ua totogi e ala i le VAGST. O se taumafaiga ina ia faamāmā avega i le siisii pea o le tau o le soifuaga.
Peitai e mae‘a ona pasia le tala o le tupe lenei ona agai loa lea o nisi o ofisa o le Malo ina ia faamautu siitaga o a latou auaunaga ma na ta‘ua e le Alii Minisita Agai o Mataupu tau tupe, le Afioga Afualo Dr Wood Salele, o siitaga la ia o le a taumafai e faapaleni ai lafoga ia ua folafola i le atunuu o le a aveesea i lenei tausaga faaletupe o le a amata.
O le talanoaga la o le tala o le tupe lea ua amata i le Palemene i Mulinuu i le asō o le a faaali ai le tele o finagalo eseese i le faasoaga o lea seleni mai i sui o Itumalo ma o le manatu laualuga o itu uma e lua, ina ia mafai ona faasoa ma ia iai auala e tuuitiitia ai le siisii pea o le tau o le soifuaga i lenei vaitaimi.