Fesiligia tiute ofisa o Faamasinoga i le toe maua e le ulugalii o o la tusifolau sa taofia i le vaavaaiga malu a le ofisa o Faamasinoga i Mulinuu
O se ulugalii talavou sa nonofo i Malifa ua faamaonia ua sosola ese ma Samoa, ae o loo faatali le taimi e tutulai ai i le faamasinoga e tali i moliaga o le umia o laau faasāina ma le umia o ni laau malosi e lē faatagaina. O se osofaiga a leoleo i le fale o lea ulugalii na maua ai ia vaega.
Sa taofia o la tusifolau ma pepa malaga i le ofisa o faamasinoga e tusa ai ma se poloaiga a le faamasinoga. Peitai ua faaalia e se molimau mai le matagaluega o leoleo ma falepuipui, ua iloa ane nei na mafai ona sosola ese ma Samoa lea ulugalii ina ua toe maua o la tusifolau sa taofia i le vaavaaiga malu a le ofisa o faamasinoga i Mulinuu.
“O le mea lena e ofo ai, ma ua leai se faatuatuaga o leoleo i le pitolaau a lea ofisa pe afai o se gaioiga a se tasi poo nisi foi o lea ofisa na mafai ai ona toe maua e le ulugalii o la tusifolau”, o le faamatalaga lea a le molimau.
Ua ta‘ua lava e lea molimau ua maua nei ni faamatalaga e leoleo o Amerika ua oo i ai le ulugalii o Paulo le tamaloa. “O le Loia sili lava a le Malo na te faia se tusi e tusa ma ala o le tulafono e mafai ai ona talosagaina se fesoasoani a le vaega o le FBI ma leoleo i Amerika e toe aumai ai le ulugalii”.
E lei manuia taumafaiga mo se finagalo o le Komesina o leoleo ona sa malaga i atunuu mamao i le vaiaso na tea nei. E faapena foi le lē manuia o taumafaiga mo le fia maua o se faamatalaga mai le pulega o le ofisa o faamasinoga. E lē o se taimi muamua lenei ua aliali mai ai ni faaletonu i le saili atu o ni tagata o loo nofo saisaitia i ni moliga faasolitulafono ua sosola ese ma le atunuu.
O nisi o mataupu faapenei sa tuua‘ia ai le pitolaau a leoleo, i le mafai ona saini o le kilia a se tagata ae o loo molia i se solitulafono. O faaletonu ia sa tutupu i tausaga ua mavae a o faagasolo le sainiga o kilia mo pepa malaga o se tagata a o lei tuua le atunuu mo le malaga atu i se isi atunuu i fafo.
O aso nei ua iai suiga, ua lē toe sainia ai ni kilia, ae mo tagata e molia i ni solitulafono ae lei faia i ai ni suesuega ma ni faaiuga a le faamasinoga, e masani lava ona iai le poloaiga e taofia o latou pepa malaga ma tusifoalu i le ofisa o le lesitala o faamasinoga.
E pei ona silafia se tasi o mataupu i le fā tausaga ua mavae na toe maua ai le alii o Ropati Nauer sa sola ese ma Samoa a o faatali lona faamasinoga i ni moliaga o le faamalosi o se tamaitai. E fitu tausaga o sola ese ma Samoa lea tagata, ae na toe maua lava ma aumai fai lona faamasinoga ma faamaonia ma tuli ai lona faasalaga e oo mai i le taimi nei.
