O se vaega o le soifuaga o le a avea pea o se talafaasolopito i soifua o i latou ua filifilia i tofiga ma mautulaga i le pulega o le Aai Tele o Aukilani ua tulai mai nei.
Ona o le uluai pulega ma tofiga ua faamanuia ai talu ona mae‘a le faigapalota lautele mo le aai, a o se uluai taimi foi lea ua avea ai Aukilani ma Super City talu ona amata mai faiga malo ma faaitumalo mo se taimi umi.
Na amata mai i le Aso Gafua o le vaiaso talu ai, o le aso ono lea o le masina o Novema, ona faatauto le alii Pulenuu, sosoo ane ai ma le Fono a Faufautua ua filifilia mo le Aai Tele o Aukilani.
A o le afiafi o le Aso Tofi na amata ai ona osi feagaiga ma faatauto sui o tagata lautele mai vaega eseese o le aai (Community Boards).
I Aukilani i Saute lava ia, na pau lea o le itumalo ua faamanuiaina ai le toatele o tamalii ma tamafanau a Samoa ma le Pasefika atoa.
E lē gata ina tulai mai le afioga ia Anae Arthur Anae ma le susuga i le alii leoleo ia Alf Filipaina e avea ma Faufautua, ae o nisi foi ua filifilia mo sui o lea lava fono faatonu mo tagata lautele.
O le afioga ia Tunumafono Ava Faamoe ma le tamaitai ia Josephine Bartley sa faatautoina i le afiafi o le Aso Tofi na tea nei.
O Tunumafono o le sui mai le Otara Ward, a o Josephine o le sui mai Maugakiekie-Tamaki.
O le isi vaega tele o sui taitasi mai Magele ma Otahuhu o le a faia le sauniga mo i latou i le afiafi o le Aso Gafua, aso 15 o le masina nei lava.
