‘E sili le puipuia i lo le togafitia’
E silia i le tolu sefulu i latou sa tufatufa i ai tusipasi, ina ua mae‘a vaiaso e ono sa faagasolo ai ni a‘oa‘oga faapitoa, e fesoasoani ai mo le tausia lelei ma le vaaia o gasegase tumau ua aafia ai.
O i latou uma ua aafia ma ua tauaveina gasegase e pei o le suka ma le toto maualuga sa faaautū i ai se polokalame sa faatinoina i totonu o le ekalesia Mamona, Le Au Paia o Aso e Gata Ai i Aukilani i Saute.
O se avanoa sa ofoina mo soo se tasi lava e fia auai, ma fia malamalama lelei i le puipuia ma le vaaia lelei o le soifua, e ui ina ua aafia i gasegase e pei ona ta‘ua. O le polokalame sa faatinoina ma aumaia i totonu o le ekalesia Mamona mo lona faataunuuina ai.
O le faletua ia Pua Fatupaito sa faauluulu i ai lenei polokalame tāua.
O polokalame faalea‘oa‘oga sa faia mo le ono vaiaso, sa lagolagoina malosi e tamā ma tina faatasi ai foi ma nisi o talavou, ma sa faaaogāina ai pea le gagana Samoa.
Sa tele se fesoasoani sa maua ai, ona sa taulai ma faaautū i le tāua o taumafa e faaaogāina.
E lē gata i lea, ae sa toe faatepa ai foi i le gaioiga a taumafa i totonu o le tino o le tagata, atoa ai ma ituaiga taumafa e mafua ai ona amata ma faaputuputu ai ma‘i e pei o le suka ma le toto maualuga.
O lona tāua lea ina ia silafia ai taumafa tonu e tatau ona tagofia ma tausia mo le vaaia lelei o gasegase tumau ma lona faaitiitia ma le togafitia.
O se polokalame foi sa lagolagoina malosi e le pulega o le soifua maloloina a Manukau.
O le tufatufaina o tusipasi mo i latou sa auai i le polokalame, e lē gata o se tulaga tāua mo i latou e faamaufaailoga ai le auai, ae o le a avea foi ma lauga aogā mo nisi e mafai ona molimau atu i ai.
O le saunoga a le tamaitai sa taiulu i le polokalame, Pua Fatupaito sa ia molimau ai ma faafetaia le fesoasoani a le pulega o le soifua maloloina ua mafai ai ona faataunuuina le fuafuaga aogā tele.
Sa ia faafetaia foi le mamalu o tamā ma tina sa auai mo ia a‘oa‘oga, ona o le faatāuaina o mataupu faapea, auā o se fesoasoani foi mo i latou a o feagai ai ma gasegase tumau.
Sa molimauina foi e i latou na auai, le tāua ma le aogā o lea a‘oa‘oga sa faatinoina.
O le Aso Lulu o le vaiaso talu ai i le malumalu o le ekalesia Mamona i Papatoetoe sa faatino ai le tufatufaina o tusipasi o i latou ua mae‘a ma faaiuina mai lea polokalame.