O le Aso Lua na tea nei sa amata ai fesootaiga a le FM89.3 i Sini, le Samoa Sportstar.com ma le Talofa FM i Apia.
O le susuga i le alii pule o le Leitio Polenisia ma le Talofa FM ia Corey Keil na talia lenei talosaga mai Sini mo se avanoa e auina tuusa‘o atu ai tala fou mai Samoa mo Sini Ausetalia.
O le itula e tolu i aoauli o Aso Lua taitasi i Sini e maua ai lenei fesootaiga ma o se avanoa lelei mo le mamalu o le atunuu i Sini e faafofoga ai i Tala mai Samoa i le amataga o vaiaso taitasi.
Ua mafai nei foi ona silafia vave ai e aiga ma tagata i Sini tala i o latou afioaga ma itumalo i Aso Lua taitasi e aunoa ma le toe faatalitali i faaiuga o vaiaso mo ni faaopoopoga fou.
O se tasi o auaunaga faaopoopo a le Talofa FM o le faamāmā avega i aulotu ma afioaga o fia faatau a latou mea faaleotele leo ma isi oloa mo malumalu ma maota o galuega. I se fua faatatau e sili atu le taugofie pe a faatau i Samoa nei nai lo le aumai i fafo ma taugata le totogi o tiute.
Ua faaopoopo nei lenei fesootaiga a Samoa ma Sini i le lisi o tautua a le FM89.3 ua tele taaloga ma faamoemoe tetele o le atunuu i Ausetlaia nei ua faasalalau mai ai faapea ana tala fou i lea vaiaso ma lea vaiaso.
