O le vaiaso lenei ua amata aloaia ai le polokalame o le Tausala o le Teuila poo le Miss Samoa mo lenei tausaga.
E toavalu tamaitai ua tausinio i lenei tausaga, toatasi mai i Ausetalia ma le isi toafitu mai i Samoa nei. Na fesiligia le kamupani a le Manaia Events o i latou ia ua faatautaia le faaaliga tele o tausala i lenei tausaga, pe aisea ua leai ai se tausala o Samoa mai i Niu Sila o tauva i lenei tausinioga, ae o le faamatalaga o lea na avatu le avanoa ae e oo lava i le taimi ua mae‘a ai lenei tausinioga e lei iai se suafa o se tamaitai ua faaulu mai mo le faaaliga a Samoa lava ia.
O i latou mai i Samoa nei ua tausinio e toatasi e mai i le motu tele i Salafai, le tamaitai lea na manumalo i se tausinioga na faia auā le faamanatuga o le tutoatasi.
O le suiga tele o lenei faaaliga e ese mai i le faamatuu atu i se kamupani tuma‘oti le Manaia Events latou te faatautaia le tauvaga, o le itu lea ua lua vaiaso ua faagasolo ai polokalame mo tausala a o lei oo i le aso o le faaaliga.
O a latou asiasiga i nofoaga e pei o le Nofoaga o tagata matutua i Mapuifagalele, o le asiasiga i fanau o loo faataotolia i le falemai tele i Motootua, o le po ua atofaina mo a latou faatalatalanoaga.
O le aso ua mafai ai ona folasia mataupu ua tuu atu e le komiti poo faamasino e talanoa i ai ma le agai atu i sauniga lotu ma isi faatasiga tāua o le Teuila. O a latou gaioiga uma, o puega ata atoa ai isi faatasiga o le a faapea ona tuufaatasia ai o latou togi ma faamae‘a ai loa i le faaaliga tele i le lua vaiaso o loma nei lea e taualuga ai le Vaiaso o Faaaliga o le Teuila.
O le faletalimalo o le Orator, o i latou foi nei e iai le pulega o le Manaia Events lea na faafeiloai atu ai nei tamaitai i sui tusitala ma sui o le atunuu aemaise o i latou o loo lagolagoina nei tamaitai i le aso ananafi, ae o le asō lea e faagasolo atu ai a latou polokalame i le Maota o Tina ma Tamā matutua i Mapuifagalele auā le tauaao atu i ai o meaalofa ma feiloaiga ma tagata matutua.
O loo iai foi se feiloaiga ma le vaega o loo nafa ma le faalauiloaina o nei tamaitai i luga o le internet mo le lua o vaiaso o loo ua amata nei, ma o iina e tatala ai palota mai le mamalu lautele mo le filifiliga a tagata i le tausala o le atunuu.
