O se tasi o vaalele helikopa o le ituaiga o le Eurocopter AS350 lea ua ave e le malo le faatagaga e tautua ai i Samoa nei
Ua faamautu e le Alii Palemia, Tuilaepa Lupesoliai Sailele Malielegaoi, le amata loa o le auaunaga a se kamupani helikopa i totonu o Samoa. O se kamupani ua faaigoaina o le Samoa Helicopters Company, ma e lua ana vaa ua fuafua e faaaogā i totonu o le atunuu auā le feaveaia o gasegase oso faafuasei ma le faia o galuega laveai i totonu lava o le atunuu.
Na toe faamanatu e le alii Palemia o se tasi lea o atinae na folafola e le Tautua Samoa a sao mai i totonu o le faigamalo a Samoa o le a silasila e faatino ae o lea ua tino mai i le malo a le HRPP lea manaoga i le fesootaiga ma le kamupani lea e ta‘ua o le Samoa Helicopters.
Ta‘ua e le alii Palemia e leai se tupe a le Malo o alu ai ae o le atinae lenei e $5miliona tala lona tau atoa e faatupe ai, ma o le kamupani lava o le a faatinoa lea galuega ma le faamoemoe e toe maua lava le seleni faaalu i auaunaga e faatino i totonu o le atunuu.
Faaalia e le alii Palemia ua leva lava ona iai le fuafuaga i se auaunaga faapea ae na faatali lava mo kamupani mai i fafo e iai le manaoga e faatutū atinae i totonu o le atunuu e aumaia lea auaunaga.
O le tamaitai ofisa sili o le Pulega o Tagata Tafafao Maimoa mai fafo lea na faatautaia feutagaiga ma le kamupani lenei auā le faatuina i Samoa, le susuga Papalii Sonja Hunter.
O le sui o le kamupani e faatautaia feutagaiga o lenei atinae – le kamupani o le Simple Solutions Aviation e suafa ia David Tohi ma le pule o le Samoa Helicopters Rodger McCutcheon i le feiloaiga ma le alii Palemia, Tuilaepa Lupesoliai Sailele Malielegaoi e faamautu ai lenei atinae fou
O vaalele nei i le ituaiga o le Eurocopter AS350 e mafai ona faia sailiga o tagata leiloloa ma le laveaia o i latou e moomia le fesoasoani aemaise o le felaua‘iga o gasegase ua vave moomia le fesoasoani e lē gata i totonu lava o Samoa ae ua mafai foi ona agai i motu tuaoi e pei o Amerika Samoa, Tokelau faapea ma Uea ma Futuna.
Faaalia e le pule o lea kamupani le alii papalagi ia Rodger McCutcheon o le taulai lava a lea auaunaga o le faasaoina o soifua.
O Ausetalia e iai le kamupani lenei ma e 35 tausaga o faia lenei tautua o le fesoasoani i galuega laveai ma le sailiga o tagata poo vaa leiloloa foi. E lē gata i lea o loo iai uma lava meafaigaluega mo galuega laveai ia latou vaalele.
E 20 vaalele a lea kamupani i Ausetalia ae e 2 ia o le a amata ai le auaunaga i totonu o Samoa. Ua talia foi e le pulega o vaalele a Samoa le laisene ma le faatagaga e tautua ai lenei kamupani i Samoa.
