Ua faaalia e le Peresetene o le Toomaga mo ē Puapuagatia, le Afioga Siliniu Lina Chang se fuafuaga ua iai nei a le Faalapotopotoga ina ia faaulu se tagi faasaga i le Ofisa o Leoleo ona o se suesuega ua manatu le Toomaga ua faaleaga ai le galuega ma le igoa o le Faalapotopotoga a o feagai ai ma le tautuaina o le atunuu i fesoasoani ua sulufai atu le atunuu e saili fofo ai. O le mataupu lenei ua laga i le mae‘a ai o se faamasinoga na ave ai e le ofisa o leoleo le Peresetene ma se alii na faatautaia se suesuega a Leoleo lava ia, ona o se tagi na faaulu atu e le Faalapotopotoga i le matagaluega i le lua tausaga talu ai.
O se teine talavou o Lano na nofo i le fale o le faafeagaiga o le EFKS a lea afioaga ma lona faletua. Na faapea lipoti na pei lava o se alo o le faafeagaiga ma lona faletua, ae na fai le tagi a lenei tamaitai talavou faasaga i le faletua ia Elaine Ulia e faapea, ua faia e le faletua ni uiga matagā faasaga ia te ia.
Na faagasolo suesuega ma ave ai e le Toomaga mo ē Puapuagatia le mataupu i Leoleo peitai na fai le iloiloga ma o le lē lava o mau e faamaonia ai lea tagi, ma le tulaga lea ua leai le tamaitai, na avea ma molimau autu o lenei mataupu, sa nofo ai foi i le fale o le faifeau lea na faalēaogā ai loa le mataupu.
Na faaauau suesuega a leoleo ona o moliaga na faia faapea ua aiāina e le Peresetene ia Siliniu le galuega a le tulafono e ala lea i le tauanauina o le molimau e alu ese ma Samoa i le taimi o le iloiloga o le faamasinoga.
E lē gata la ia Siliniu ae faapea foi le leoleo na faatautaia le suesuega o le mataupu faapea ai foi ma se sui o le Toomaga mo ē Puapuagatia ia Tumua Luafalealo ma le faletua ia Elaine.
O lea ua mae‘a le iloiloga ma ua faalēaogāina uma ai tagi na faia faasaga ia Siliniu ma le alii Leoleo suesue ae o loo faamaonia moliaga faasaga i le faletua ma le tamaitai ia Tumua Luafalealo ma ua ta‘ua e toe apili e i laua nei le faaiuga a le Faamasinoga.
Faaalia le faafetai o le afioga Siliniu i le lagolago a le atunuu ma paaga a le Toomaga mo ē Puapuagatia i le taimi atoa o lenei mataupu ae na ia faaalia le faanoanoa tele i le tuua‘iga na faia ma le ta‘uvalea ai o le Faalapotopotoga.
Na ia faaalia le matafaioi a le Toomaga o le tali atu i talosaga ma faitioga ua avatu e le atunuu, ma e galulue faatasi lava ma leoleo i le taumafaiga ina ia oo mataupu nei o solitulafono i luma o le faamasinoga peitai na toatele lava na masalomia le faatinoga o a latou galuega ina ua laga moliaga nei.
O lea la ua ia ta‘ua ai ua fono le komiti faafoe e vaaia galuega a le Toomaga mo ē Puapuagatia atoa ai ma le loia a le Faalapotopotoga ma ua tasi ai e tatau ona ave Leoleo i le Faamasinoga ona o le faia o nei moliaga.
O le mau i le mataupu lenei e pei ona fofogaina i le iloiloga, sa fai se tusi i le Komesina o Leoleo e le Toomaga mo ē Puapuagatia atoa ai le alii leoleo na vaaia le mataupu e faalēaogā le mataupu ae na sau le tali a le Komesina o Leoleo sa iai, e lē mafai lea tulaga ona e tatau lava ona oo i luma o le faamasinoga ma talosaga sa‘o le tamaitai na faia le tagi i lea tulaga.
Peitai na ta‘ua foi i lea iloiloga na faia ni fonotaga i le va o le tamaitai lenei o Susan Stowers ma ona mātua ma sui o le Toomaga ina ia aveese ai le tagi ae toe fofo i tua peitai o le tali lava lea ma na ta‘ua ai loa auala na taumafai ai Siliniu, le faletua ma Tumua e tauanau le tamaitai molimau autu e alu i Amerika Samoa i le taimi tonu o le iloiloga peitai na maua mulimuli e le faamasinoga, sa molimau lava mātua o lea tamaitai sa iai lava le fuafuaga e ave le la tama, le molimau lea i Amerika Samoa e saili ai se galuega ae e lei iai se manatu e ave ona o le mataupu e pei ona tuua‘ia ai le faletua o le faafeagaiga.
O lea e faatali se isi tagi ua fai e le faletua faasaga i le faafeagaiga ma le tamaitai na tagi, ona ua maua ane o loo ma‘itaga le tamaitai talavou lea i le faifeau ma ua nonofo i le taimi lenei.
