Alofaaga o le 70 tausaga o le soifua o le tina ia Soa Stowers

Ua paia le taeao ma le asō, ua iike foi fagua a lalo, auā o lea ua tau lau o le faamoemoe e pei ona taupoina.
Ua tala mai le lagi le mamalu o le Atua, ua faaalia mai foi e le vanimonimo le galuega a ona aao. Leitioa foi le faisalamo a faapea ifo, ‘Lou Agaga e, ia e faamanū atu i le Alii o mea uma foi o i totonu ia te au ia faamanū i lona suafa paia.’
Ae o le a fagatonu loa le malama ma vili tonu le ifi a Maina, e pei ona iai le faamoemoe o le asō. O le viiga ma le faamanū i lo tatou tamā o i le lagi ona ua mafai ai e lo matou tina peleina o Soa Stowers le atoaga o le 70 tausaga o lona aso soifua. Na soifua mai si o matou tina i le aso 6 Novema 1943.
O le upu o le Tusi, ‘o se Tina amio lelei e silisili lona tau na i lo penina’. Matou te tatalo pea i le Atua ina ia foai nisi tausaga ma nisi aso se tele mo lou Soifua, auā le tatou mafutaga faifai pea. O oe o le pae ma le auli i totonu o le tatou aiga.
E te fautua malosi ia Tamā auā le faaleleiina o patupatu o loo mafai ona ulufia ai pea le fili, o oe foi o le auli e faamafolafolaina le maanuminumi o faafitauli e tutupu i totonu o le tatou aiga. Ia faatasi pea le Atua mo oe i aso uma, aemaise lenei aso faapitoa o aso e faaopoopo i lou soifua.
O faamanuiaga ma Alofaaga na e avatu i le Tamā o le aiga ia Lutuiloa Miki Stowers ma le lua fanau, faapea fanau a lau fanau aemaise ou aiga mai Samoa, Niu Sila ma Ausetalia; Ona o Iesu, Amene.