Tatala ma faalauiloa CD pese a Tenari Tautua i Melepone

“O sē ua faatumulia i le agaga o le fiafia ina pese ia,” auā o le “Pese o se vailaau aogā i agaga atoa ma mafaufau,” o mau ia a le afioga a le Atua. A o le fofoga lafo o le faleupolu, “o le faamoemoe ua taunuu o le laau lea o le soifua.” O le afiafi o le Aso Toonai na tea nei na faatumulia ai le malu o faafiafiaga i le pitonuu o Hamton Park i le aai o Melepone, i le paia lasilasi ma le mamalu o Samoa, mai lava i alo ma fanau talavou e oo lava i tuaa matutua, ona o le fia faafofoga ma maimoa matamata i le lalelei ma le talenia o lenei tamalii o le atunuu, ua loa tausaga o tautaua ma logologoā i le taleni o le musika, le afioga ia Galumalemana Tenari Tautua poo Tenari e pei ona lauiloa ai.
O loo faataamilo le malaga faafiafia a Tenari ma nisi o tamalii ua lauiloa foi i le taleni o le musika, le susuga ia Peneueta Matautia ma le susuga ia Nevo Brown. O le faili malosi a le Young Ulalei Band na galulue faatasi ma nei tamalii pepese auā le faafiafiaina o le mamalu na afifio atu mo le faamoemoe.
Saunoa le susuga ia Taupau Opapo le alii pule o le Young Ulalei, o se fiafiaga sili i lona finagalo, ona o le mafai ona autovaa mai nei tamalii lauiloa o le atunuu, se‘i maimoa silasila Samoa ma faafofoga ia latou taleni o loo tautaua ai, auā o le toatele lava, e na o le ta‘u lava o suafa o tamalii pepese, ae lei silasila lava ma feiloai i ai. Na faaalia foi lona matuā olioli ona o le avanoa faaauro ua tautua faatasi ai la latou faili ma nei tamalii iloga o le musika. O le faamoemoe o le afiafi, na faalauiloa ai CD fou e lua a le susuga a Tenari, o le CD ua faaigoaina o le “Tama Matua” na pueina i Aukilani Niu Sila, ma le isi CD na pueina i Kalefonia i Amerika.
Na faafiafiaina le mamalu i Melepone, ona e lē gata i le faafiafiaga matagofie i lea afiafi, ae toe maua ma CD e lua i se tau taugofie tele sa faatauina ai. Tau ina ia faamanuia pea le Atua o taleni, i nei tamalii sailimalo o Samoa, aemaise o le faili a le Young Ulalei.